Душанбе, 25 сентябр, – АИ «Корвон Иттилоот». Форуми байналмилалии «Аз камбизоатӣ то рушд» дар шаҳри Намангани Ӯзбекистон баргузор гардид, ки беш аз 30 созмони маъруфи ҷаҳонӣ ва тақрибан 200 коршиноси байналмилалиро гирд овард.

Тоҷикистонро дар форум Вазири меҳнат, муҳоҷират ва шуғли аҳолии Ҷумҳурии Тоҷикистон Солеҳа Холмаҳмадзода бо маърӯзаи худ таҳти унвони «Маҳорати касбӣ ҳамчун омили рушди устувор: таҷрибаи Тоҷикистон дар омӯзиши бозори меҳнат» муаррифӣ намуд.

Вазир дар суханронии худ таъкид кард, ки мубориза бо камбизоатӣ ҷузъи муҳими сиёсати иҷтимоӣ буда, омили асосии таъмини субот, адолати иҷтимоӣ ва баланд бардоштани сатҳи зиндагии аҳолӣ маҳсуб меёбад. Ӯ қайд намуд, ки форум имконияти нодир барои мубодилаи таҷрибаи муваффақ ва дарёфти роҳҳои муштараки ҳалли масъалаҳои шуғл ва камбизоатӣ, инчунин таҳкими ҳамкории байналмилалӣ мебошад.

Ба равиши стратегии Тоҷикистон дар рушди шуғли истеҳсолӣ ва омодасозии мутахассисони баландихтисос таваҷҷуҳи махсус зоҳир гардид, ки ин самт яке аз афзалиятҳои Ҳукумати кишвар дар мубориза бо камбизоатӣ ба ҳисоб меравад. Дар солҳои охир, Тоҷикистон дар ин ҷода ба дастовардҳои назаррас ноил гардида, барномаҳои такмили маҳорати касбии аҳолӣ ва густариши имкониятҳои шуғлро татбиқ менамояд.

Дар форум таъкид шуд, ки масъалаҳои шуғл ва мубориза бо камбизоатӣ на танҳо барои Тоҷикистон ва Ӯзбекистон, балки барои тамоми ҷомеаи ҷаҳонӣ мубрам мебошанд, ки мубодилаи таҷриба миёни кишварҳо аҳамияти хос дорад.

АКС: Вазорати меҳнат, муҳоҷират ва шуғли аҳолии Ҷумҳурии Тоҷикистон