Душанбе, 25 сентябр, – АИ «Корвон Иттилоот».  Аз 20 то 26 сентябр дар шаҳри Алмато фестивали байналмилалии ҷашнвораи кинои аввалин ва ҷавонон «Байконур» (Baiqonyr) баргузор мегардад.

Имсол дар барномаи фестивал бори аввал озмуни сериалҳо низ ворид шудааст, ки дар он лоиҳаи тоҷикӣ — сериали «Хона» («Дом — Ловушка») таҳти коргардонии Далер Раҳматов, офаридаи гурӯҳи медиявии «Азия-Плюс», ширкат меварзад.

Қаҳрамонзани асосӣ — Малика

Ба иттилои ташкилкунандагон, барои иштирок дар озмуни сериалҳо 67 лоиҳа аз кишварҳои Осиёи Марказӣ пешниҳод гардиданд. Аз онҳо танҳо шаш асар ба интихоби ниҳоӣ роҳ ёфтанд: се сериал аз Қазоқистон ва ҳар кадоме аз Тоҷикистон, Қирғизистон ва Узбекистон.

Сериали шашқисмаи «Хона» қиссаи духтари ҷавон ва содда бо номи Малика мебошад, ки аз як ноҳияи дурдаст ба Душанбе меояд, то барои муолиҷаи падараш, ки сахт бемор аст, маблағ пайдо кунад. Аммо дар пойтахт вай ба доми фиребгарон меафтад ва қимати ин мубориза хеле баланд мешавад — худи ҳаёти қаҳрамон зери хатар мемонад.

Дар чорчӯби фестивал ҳамчунин муаррифии лоиҳаҳои нави сериалҳо (питчинг) баргузор мешавад. Аз ҷумла, ба ҳайати доварон лоиҳаи «Як бор таваллуд мешавем, сад бор мемирем» пешниҳод мегардад, ки сенарияашро коргардони тоҷик Искандар Усмонов навиштааст ва продюсери он Айдархан Адилбоев (Қазоқистон) мебошад.

Сюжети ин сериал дар бораи ширкати сохтмонӣ нақл мекунад, ки роҳбараш як зани тоҷик аст. Қаҳрамон мекӯшад орзуи шавҳари вафоткардаашро, ки сохтани «Душанбеи нав» буд, амалӣ созад, аммо дар ин роҳ бо талафоти шахсӣ ва мушкилоти ҷиддӣ рӯ ба рӯ мешавад.

Маросими пӯшидашавии фестивал ва ҷоизасупорӣ ба ғолибон 26 сентябр баргузор мегардад.

Акс: саҳнае аз сериал