Душанбе, 02 октябр, – АИ «Корвон Иттилоот». 1 октябр дар Тоҷикистон маъракаи даъвати шаҳрвандон ба хизмати ҳатмии ҳарбӣ оғоз гардид, ки то 30 ноябр идома меёбад. Тибқи фармони Президенти Ҷумҳурии Тоҷикистон, ба сафи Қувваҳои Мусаллаҳ ҷавонони аз 18 то 27-сола ва инчунин шаҳрвандони синну соли болотаре, ки ҳуқуқи ба таъхир гузоштан ё озод шудан аз хизмат надоранд, даъват карда мешаванд.

Дар рӯзи аввал таваҷҷуҳи зиёд ба Вилояти Мухтори Кӯҳистони Бадахшон равона шуд, ки дар он ҷо нақшаи даъват ба андозаи 101% иҷро гардид. Субҳи 1 октябр дар шаҳри Хоруғ ҷамъомади тантанавӣ ва раҳпаймоии идона баргузор шуд. Дар он роҳбарони шаҳр ва ноҳияҳо, намояндагони сохторҳои давлатӣ, собиқадорон ва волидони даъватшавандагон ширкат карданд. Ҷавонони ВМКБ ҳашт сол пайдарпай нишон медиҳанд, ки нақшаи даъватро дар рӯзи аввал иҷро менамоянд.

Ҳамзамон, ноҳияҳои минтақаи Рашт — Сангвор, Лахш, Тоҷикобод, Нуробод ва Рашт низ нақшаи даъватро ба пуррагӣ иҷро карданд. Даъватшавандагон бо хоҳиши худ ба қисмҳои ҳарбӣ ҳозир шуда, сафи Артиши миллӣ пур гардид.

Онҳоро намояндагони мақомоти давлатӣ, кормандони Вазорати мудофиа, волидон ва фаъолони ҷомеа бо суханони нек ва дуои модарон гусел карданд.

Рӯзи 30 сентябр бошад, дар шаҳри Бохтар, Норак, Левакант «Рӯзи даъватшаванда» баргузор шуд, ки дар он ба ҷавонон шароити гузаронидани хизмат ва имкони истифода аз алтернативаи пулакӣ шарҳ дода шуд.

АКС: Шуъбаи кор бо ҷавонон ва варзиши шаҳри Бохтар 

Шароити хизмат

Даъват ба артиш ду маротиба дар сол мегузарад: баҳорӣ (аз 1 апрел то 31 май) ва тирамоҳӣ (аз 1 октябр то 30 ноябр).

Давомнокии хизмати ҳатмӣ — 24 моҳ.

Хатмкунандагони донишгоҳҳо, ки дар кафедраҳои ҳарбӣ таҳсил кардаанд, пас аз 12 моҳи хизмат унвони афсарӣ — лейтенанти хурд мегиранд.

Хизмат дар шакли алтернативӣ

Дар Тоҷикистон имкони хизмати пулакӣ низ мавҷуд аст. Ин шакли алтернативӣ якмоҳаи омӯзиши ҳарбиро пешбинӣ мекунад, ки ба ҷойи ду соли хизмати ҳатмӣ дар артиш гузаронида мешавад. Барои он лозим аст, ки шаҳрванд ба комиссариати ҳарбӣ муроҷиат кунад, аммо шумораи квотаҳо маҳдуд мебошад.

Арзиши хизмати пулакӣ айни ҳол 56 ҳазору 250 сомониро ташкил медиҳад (750 нишондиҳандаи ҳисобӣ, ки ҳар кадоми он 75 сомонӣ муқаррар шудааст).

Вазорати мудофиа то ҳол шумораи квотаҳои ҷудошударо барои даъвати тирамоҳии соли 2025 эълон накардааст.

АКС: АМИТ Ховар