Душанбе, 22 сентябр, – АИ «Корвон Иттилоот».  Дар шаҳри Душанбе мулоқоти директори Муассисаи давлатии «Маркази миллии патентӣ ва иттилоотӣ» назди Вазорати рушди иқтисод ва савдои Тоҷикистон Мирзо Исмоилзода бо намояндагони Барномаи рушди ҳуқуқи тиҷоратии Вазорати савдои ИМА (Commercial Law Development Program – CLDP) таҳти роҳбарии ҳуқуқшиноси калони он Ҷеймс Филпи баргузор гардид.

Бино ба иттилои марказ, дар ҷараёни гуфтушунид ҷонибҳо масъалаҳои марбут ба тиҷоратӣ гардондани ихтироот, интиқоли технологияҳо ва бозомӯзии мутахассисонро баррасӣ намуданд. Ин самтҳо барои таҳкими низоми миллии моликияти зеҳнӣ аҳамияти хоса доранд, зеро маҳз он бо ҷалби сармоягузорӣ ва боло бурдани рақобатпазирии иқтисоди кишвар иртиботи мустақим дорад.

Тоҷикистон солҳои охир ба рушди иқтисоди навоваронаро ҷиддан таваҷҷуҳ дорад. Дар шароити ҷаҳонишавӣ ва рақобати афзоянда ҳифзи патентӣ, интиқоли муассири технология ва дастгирии ихтирооткорон заминаи воридшавии кишвар ба иқтисоди ҷаҳонӣ ба шумор мераванд. Ҳамкорӣ бо CLDP имкон медиҳад, ки Тоҷикистон таҷрибаи пешрафтаи байналмилалиро омӯзад, ки ин махсусан дар заминаи узвият дар Созмони Умумиҷаҳонии Савдо (СУС) ва рушди содироти маҳсулоти дорои арзиши иловашуда муҳим аст.

Ҷонибҳо аз натиҷаҳои мулоқот изҳори қаноатмандӣ намуда, омодагии худро барои амиқтар сохтани шарикӣ таъкид карданд. Дар марҳилаҳои минбаъда таваҷҷуҳи асосӣ ба механизмҳои амалии дастгирии ихтирооткорон, фароҳам овардани шароит барои татбиқи дастовардҳои онҳо дар истеҳсолот ва тавсеаи ҳамкории байналмилалӣ дар соҳаи ҳифзи моликияти зеҳнӣ равона хоҳад шуд.

Акс: Маркази миллии патентӣ ва иттилоотӣ