Душанбе, 22 сентябр, – АИ «Корвон Иттилоот». Тибқи гузориши Gallup, зиёда аз 95% аҳолии кишвар худро комилан бехатар ҳис мекунанд ва мақомоти қонун ва тартибот эътимоди баланди шаҳрвандонро доранд.

Ҷумҳурии Тоҷикистон ба сафи пешсафони ҷаҳон оид ба нишондиҳандаи «ҳуқуқ ва тартибот» ворид шудааст, тибқи «Global Safety Report – 2025» аз Институти амрикоии назари умумии Gallup. Ин рейтинг на танҳо сатҳи амниятро, балки суботи ҷомеа ва эътимоди шаҳрвандон ба мақомоти қонун ва тартиботро низ инъикос мекунад.

Тибқи пурсиш, ки дар 142 кишвар гузаронида шудааст, 97% сокинони кишвар худро комилан бехатар эҳсос мекунанд, ҳатто ҳангоми гаштугузори шабона. Дар даҳ кишвари бехатартарини ҷаҳон, ба ҷуз Тоҷикистон, Сингапур, Косово, Чин, Исландия, Ветнам, Норвегия, Австрия, Баҳрайн ва Умон шомил шудаанд.

Коршиносон таъкид мекунанд, ки чунин сатҳи баланди амният натиҷаи сиёсати пайгирона ва оқилонаи Президенти кишвар Эмомалӣ Раҳмон мебошад. Ҷорӣ намудани ташаббусҳо, ки ба тақвияти тартиботи ҷамъиятӣ, баланд бардоштани амният ва ҳифзи ҳуқуқи шаҳрвандон равона шудаанд, имкон дод муҳити эътимод ва оромӣ дар кишвар ба вуҷуд ояд.

Имрӯз муҳити суботбахш дар шаҳрҳо ва деҳот, кӯчаҳои бехатар ва меҳмоннавозии анъанавии тоҷикӣ ҳамчун арзишҳои баланд аз ҷониби ҷомеаи ҷаҳонӣ эътироф шудаанд. Дастовардҳои чандсолаи кишвар ҷойгиршавии онро дар миёни бехатартарин кишварҳои ҷаҳон таъйид намуда, нуфузи байналмилалии онро тақвият мебахшад ва обрӯи мусбат дар арсаи ҷаҳонӣ эҷод мекунад.

Нишондиҳандаҳои баланд оид ба амният нишон медиҳанд, ки таваҷҷуҳи давлат ба суботи дохилӣ, ҳифзи ҳуқуқи шаҳрвандон ва рушди ҷомеа натиҷаҳои мушаххас медиҳад. Имрӯз Тоҷикистон намунаи дигар кишварҳо буда, нишон медиҳад, ки чӣ гуна омезиши сиёсати самаранок ва ғамхорӣ ба шаҳрвандон эътимод, субот ва тартиботи ҷамъиятиро ба вуҷуд меорад.

АКС: аз манбаъҳои кушода