Душанбе, 06 октябр, – АИ «Корвон Иттилоот».  Ҳайати Донишгоҳи русиву тоҷикӣ (славянӣ) — РТСУ дар Саммити сеюми донишгоҳҳои славянӣ таҳти унвони «Уфуқи славянӣ — 2025», ки 2–3 октябр дар Донишгоҳи политехникии Санкт-Петербург ба номи Пётри Кабир баргузор гардид, иштирок намуд.

Тавре аз маркази матбуоти донишгоҳ хабар доданд, ин чорабинӣ ба табодули таҷриба, таҳкими ҳамкорӣ ва рушди фазои ягонаи таълимии кишварҳои славянӣ бахшида шудааст.

Дар кори саммит намояндагони чор донишгоҳи славянӣ, инчунин як қатор муассисаҳои олии Русия ширкат намуданд, аз ҷумла:

• Донишгоҳи дӯстии мардумон ба номи Патрис Лумумба (РУДН),
• Донишгоҳи давлатии гуманитарии Русия (РГГУ),
• Донишгоҳи политехникии Санкт-Петербург ба номи Пётри Кабир (СПбПУ).

Дар рӯзномаи саммит масоили сиёсати ҷавонон, таҳкими ҳамкориҳои илмӣ-таълимӣ, навовариҳо дар соҳаи маориф ва таҷрибаи муваффақи донишгоҳҳо мавриди баррасӣ қарор гирифтанд.

Таваҷҷуҳи махсус ба мастер-классҳо ва муаррифии лоиҳаҳои амалии донишгоҳҳо, ки ба баланд бардоштани сифати таълим ва рушди муҳити илмӣ нигаронида шудаанд, зоҳир гардид.

Иштироки РТСУ дар ин чорабинӣ нишонаи нақши фаъоли он дар таҳкими ҳамкориҳои илмию таълимии кишварҳои узви СНГ ва ҷаҳони славянӣ мебошад.

Донишгоҳ бо муассисаҳои олии Русия, Беларус, Қирғизистон ва Арманистон ҳамкории густурда дошта, барномаҳои муштарак, тадқиқотҳои илмӣ ва лоиҳаҳои фарҳангиро амалӣ менамояд.

Дар анҷоми саммит иштирокчиён зарурати тавассути васеъ кардани ҳамкорӣ дар самтҳои рақамикунонии таълим ва мубодилаи устодону донишҷӯён таъкид карданд.

Саммити «Уфуқи славянӣ — 2025» минбари муҳими муколамаи донишгоҳҳо ва муҳаққиқони ҷавон гардид, ки онҳоро арзишҳои умумии илмӣ ва фарҳангӣ мепайванданд.

Дар ҷамъбаст зикр шуд, ки ташкили фазои ягонаи таълимӣ ва илмӣ метавонад ба таҳкими дӯстии байни халқҳои славянӣ ва рушди ҳамкории устувори байни донишгоҳҳо мусоидат намояд.

Акс: Донишгоҳи русиву тоҷикӣ (славянӣ)