Душанбе, 04 октябр, – АИ «Корвон Иттилоот».  Дар ҳошияи форуми байналмилалии Kazakhstan Energy Week 2025 2 октябр  Вазири энергетикаи Қазоқистон Ерлан Аккенженов ва Вазири энергетика ва захираҳои оби Тоҷикистон Далер Ҷумъа дурнамои таҳкими ҳамкории энергетикиро баррасӣ карданд. Мавзӯи асосии гуфтушунид рушду ҳамоҳангсозии низоми энергетикии Қазоқистон, Тоҷикистон ва Ӯзбекистон буд.

Қазоқистон расман омодагии худро барои имзои созишномаи байниҳукуматӣ оид ба интиқоли нерӯи барқ аз НБО «Роғун», ки дар асоси ёддошти тафоҳуми соли 2023 пешбинӣ гардидааст, эълом намуд.

Ба гуфтаи Ерлан Аккенженов, ин санад воситаи стратегии таъмини суботи энергетикӣ дар Осиёи Марказӣ хоҳад шуд. Илова бар ин, созишнома имконият медиҳад, ки амнияти озуқаворӣ тавассути таъминоти боэътимоди соҳаи кишоварзӣ таҳким ёбад ва шароит барои тақсими мутавозини захираҳо фароҳам оварда шавад.

Ширкатҳои KEGOC ва сохторҳои энергетикии Тоҷикистон кори муштаракро барои мувофиқаи параметрҳои техникии транзити нерӯи барқ идома медиҳанд.

Омодагии Қазоқистон ба бастани созишнома бо Тоҷикистон дар мавриди НБО «Роғун» марҳалаи нави ташаккули фазои ягонаи энергетикии минтақаро боз мекунад.

 Ин қадам на танҳо вобастагии иқтисодии се кишвар — Қазоқистон, Тоҷикистон ва Ӯзбекистонро тақвият мебахшад, балки хавфҳои номувозинии энергетикиро низ коҳиш дода, заминаи устувори ҳамкории дарозмуддат ва суботи Осиёи Марказиро дар шароити таҳдидҳои ҷаҳонӣ фароҳам меорад.

АКС: Вазорати  энергетика ва захираҳои оби Тоҷикистон