Душанбе, 24 ноябр, – АИ Корвон Иттилоот. Духтури тоҷик дар финали озмуни байналмилалии «100 идея барои ИДМ», ки дар Қазоқистон баргузор гардид, ба дастовари муҳим ноил шуд. Дар озмун ҷавонони ихтироъкор ва навовар аз кишварҳои узви Иттиҳоди Давлатҳои Мустақил иштирок доштанд.

Ҷарроҳи Беморхонаи марказии ноҳияи Фархор ихтирои худро — зажими нави ҷарроҳӣ — муаррифӣ намуд, ки барои баланд бардоштани амният ва самаранокии амалиётҳои тиббӣ пешбинӣ шудааст. Тибқи арзёбиҳои мутахассисон, ин дастгоҳ амалӣ, дастрас ва қобили татбиқи васеъ дар амалияи тиббӣ мебошад.

Лоиҳаи мутахассиси тоҷик яке аз беҳтарин пешниҳодҳои озмун интихоб шуд ва соҳиби ҷойи аввал гардид.

Барандаи ҷоизаи асосӣ, Суннатулло Шарифзода, изҳор дошт, ки ин пирӯзиро ба халқи Тоҷикистон ва рушди илми тибби миллӣ бахшидааст. Ӯ бовар дорад, ки навовариҳои табибону муҳаққиқони тоҷик метавонанд ба беҳтар шудани сатҳи хизматрасониҳои тиббӣ мусоидат кунанд.

Ин комёбӣ мавқеи Тоҷикистонро дар арсаи инноватсияҳои тиббӣ дар минтақа тақвият дода, нишон медиҳад, ки мутахассисони ҷавони кишвар дорои иқтидори баланд ва идеяҳои созанда мебошанд.

АКС: аз манбаъҳои боз