Душанбе, 28 ноябр, – АИ «Корвон Иттилоот». 9 декабр дар пойтахт Форуми дуюми байналмилалии кӯҳиву металлургии Тоҷикистон баргузор мегардад — яке аз муҳимтарин рӯйдодҳои соҳавӣ, ки ба суръат бахшидани индустриализатсияи кишвар нигаронида шудааст. Чорабинӣ бо пуштибонии Вазорати саноат ва технологияҳои нави Ҷумҳурии Тоҷикистон доир мешавад.

Ҳадафи форум — мусоидат ба иҷрои ҳадафи чорумин стратегии Тоҷикистон, ки афзоиши босуръати саноат, таҳкими рушди устувори истеҳсолот ва густариши ҳамкориҳои минтақавию байналмилалиро дар бар мегирад. Форум ҳамчунин барои тақвияти ҳамкориҳои истеҳсолӣ ва ҷалби сармоя ба бахшҳои муҳими иқтисодии кишвар хизмат мекунад.

Дар Вазорати саноат ва технологияҳои нав зикр карданд, ки форум барои пешбурди лоиҳаҳои саноатӣ аҳамияти калон дорад, бахусус дар самти истифодаи захираҳои табиии кишвар:

«Пеши рӯи мо вазифаҳои муҳим — индустриализатсияи босуръат ва дучанд намудани ҳаҷми истеҳсолоти саноатӣ истодаанд. Дар доираи форум баргузории сессияҳои мавзӯӣ оид ба геология, сармоягузорӣ, саноат ва металлургия пешбинӣ шудааст. Мо барои ҷалби сармоя, махсусан дар самти рушди захираҳои табиии ВМКБ, имкониятҳои хуб ёфтем», — хабар доданд дар вазорат.

Мутахассисон ва намояндагони бахш масъалаҳои зеринро баррасӣ хоҳанд кард:

• дурнамои бозори кӯҳиву металлургии Тоҷикистон;
• инноватсия дар таҷҳизот ва технологияҳои истихроҷ;
• усулҳои муосири коркарди канданиҳои фоиданок;
• технологияҳои устувор ва ҳалли экологӣ;
• роҳҳои тавсеаи ҳамкорӣ ва кооператсияи минтақавӣ.

Инчунин потенсиали рушди лоиҳаҳои нав дар бахшҳои истихроҷ ва коркард таҳлил мешавад, ки дар солҳои охир асоси афзоиши истеҳсолоти саноатии кишвар мебошанд.

Форуми якуми сармоягузории кӯҳиву металлургӣ, ки соли 2024 баргузор шуд, ба ташкили муоширати касбӣ ва ҷалби таваҷҷуҳи сармоягузорони хориҷӣ такони ҷиддӣ бахшид. Давом додани он дар соли 2025 мақоми Тоҷикистонро ҳамчун майдони умедбахш барои лоиҳаҳои саноатӣ ва инноватсионӣ дар бахши кӯҳиву металлургия боз ҳам тақвият медиҳад.

АКС: аз бойгонии АИ «Корвон Иттилоот»