Душанбе, 13 ноябр, – АИ «Корвон Иттилоот». 12 ноябр  таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода иҷлосияи навбатии иҷлосияи дуюми даъвати ҳафтум баргузор гардид. Дар ҷаласа масъалаҳои муҳим баррасӣ шуданд, ки самтҳои асосии сиёсати дохилӣ ва хориҷии мамлакатро инъикос менамоянд.

Яке аз қарорҳои муҳими иҷлосия тасдиқи Аҳдномаи ҳусни ҳамҷавории абадӣ, дӯстӣ ва ҳамкорӣ байни Ҷумҳурии Қазоқистон, Ҷумҳурии Қирғизистон, Ҷумҳурии Тоҷикистон, Туркманистон, Ҷумҳурии Узбекистон ва Ҷумҳурии Мардумии Чин буд.

Ин ҳуҷҷати муҳими байналмилалӣ саҳифаи наверо дар таърихи шарикии минтақавӣ мекушояд, ки ба таҳкими эътимод, субот ва рушди устувор дар фазои Евразия нигаронида шудааст.

Мутобиқи Аҳднома, ҷонибҳо иродаи худро ҷиҳати таҳкими ҳамкорӣ дар асоси принсипҳои эҳтироми мутақобила, соҳибихтиёрӣ, якпорчагии ҳудудӣ, дахлнопазирӣ ба корҳои дохилӣ, баробарӣ ва манфиати муштарак таъкид намуданд. Дар санад ба рушду густариши ҳамкорӣ дар соҳаҳои сулҳу амният, иқтисоду сармоягузорӣ, илм, маориф, фарҳанг ва робитаҳои гуманитарӣ диққати махсус дода шудааст.

Коршиносон бар онанд, ки ин иқдом қадами муҳим дар роҳи таҳкими ҳамгироии минтақавӣ ва рушди шарикии устувор бо Чин мебошад. Тасвиби Аҳднома пояи устувори сиёсиву иқтисодиро барои ҳамкориҳои дарозмуддат мегузорад ва ба таҳкими амнияти умумиминтақавӣ мусоидат мекунад.

Ҳамзамон дар иҷлосия лоиҳаи Қонуни Ҷумҳурии Тоҷикистон «Дар бораи ворид намудани тағйирот ба Кодекси тандурустии Ҷумҳурии Тоҷикистон» низ баррасӣ шуд, ки ҳадафи он такмили заминаи ҳуқуқии соҳаи тандурустӣ, баланд бардоштани сатҳи хизматрасонии тиббӣ ва ҳифзи саломатии шаҳрвандон мебошад.

Тасвиби ин санадҳо аз он шаҳодат медиҳад, ки Маҷлиси намояндагон сиёсати Пешвои миллат муҳтарам Эмомалӣ Раҳмонро пурра дастгирӣ менамояд, ки ҳадафи он таҳкими муносибатҳои дӯстона, рушди ҳамкории байналмилалӣ ва боло бурдани сатҳи зиндагии мардум аст.

Сурат: Маҷлиси намояндагони Маҷлиси Олии Ҷумҳурии Тоҷикистон