Душанбе, 06 ноябр, – АИ «Корвон Иттилоот». Дар шаҳри Душанбе 4 ноябр вохӯрии Вазири корҳои дохилии Ҷумҳурии Тоҷикистон Рамазон Раҳимзода бо ҳайати Вазорати корҳои дохилии Ҷумҳурии Узбекистон таҳти роҳбарии муовини аввали вазир — сардори департаменти ҷустуҷӯ ва фаъолияти оперативӣ, полковник Аюбхон Раҳматуллоев баргузор гардид. Дар ин бора маркази матбуоти ВКД Тоҷикистон хабар дод.

Дар ҷараёни мулоқот ҷонибҳо масъалаҳои тақвияти ҳамкорӣ дар мубориза бо терроризм, экстремизм ва гардиши ғайриқонунии маводи нашъаовар, инчунин дигар самтҳои муҳими дорои манфиати муштаракро баррасӣ карданд.

Вазири корҳои дохилӣ Рамазон Раҳимзода таъкид намуд, ки ҳамкории дуҷониба миёни ВКД Тоҷикистону Узбекистон дар асоси созишномаҳои ду ва бисёрҷониба рушд мекунад ва дорои самти судманд ва созанда мебошад. Ба гуфтаи ӯ, густариши ҳамкориҳо миёни сохторҳои ҳифзи ҳуқуқи ду кишвар заминаи боэътимод барои муқовимати муштарак ба таҳдидҳо ва хатарҳои муосир, аз ҷумла ҷинояткории фаромиллӣ фароҳам меорад.

Ҷонибҳо муҳимияти тақвияти мубодилаи иттилоот, баланд бардоштани самаранокии амалиётҳои муштараки оперативӣ, ва ҳамоҳангсозии фаъолияти мақомоти ҳифзи ҳуқуқ дар минтақаҳои наздисарҳадӣ-ро таъкид намуданд.

Мулоқот дар фазои ҳамдигарфаҳмӣ ва иродаи қавӣ барои таҳкими ҳамкориҳои амалӣ ба хотири субот ва амнияти минтақа баргузор гардид.

Акс: Вазорати корҳои дохилии Ҷумҳурии Тоҷикистон