Душанбе, 03 ноябр, – АИ «Корвон Иттилоот».  Дар доираи иҷлосияи 43-юми ЮНЕСКО 31 октябр вохӯрии Вазири корҳои хориҷии Ҷумҳурии Тоҷикистон Сироҷиддин Муҳриддин бо Вазири корҳои хориҷии Ҷумҳурии Ӯзбекистон Баҳтиёр Саидов баргузор гардид. Музокирот дар фазои дӯстона ва созанда доир шуда, идомаи тамоюли устувори ҳамкориҳои дуҷонибаро байни ду кишвари ҳамсоя боз тасдиқ намуд.

Тибқи иттилои Вазорати корҳои хориҷии Тоҷикистон, ҷонибҳо доир ба масъалаҳои муҳими ҳамкории сиёсӣ, тавсеаи робитаҳои иқтисодӣ, инчунин густариши ҳамкориҳои фарҳангиву гуманитарӣ табодули назар намуданд.

Ҳамзамон, ба татбиқи лоиҳаҳои муштарак дар самти рушди роҳҳои нақлиёту энергетикӣ ва тақвияти шарикии тиҷоратию сармоягузорӣ таваҷҷуҳи хоса зоҳир гардид.

Вазирон таъкид намуданд, ки таҳкими муносибатҳои устувори байни Тоҷикистону Ӯзбекистон на танҳо барои ду кишвар, балки барои тамоми минтақаи Осиёи Марказӣ аҳамияти стратегии дорад.
Ҷонибҳо омодагии худро барои тақвияти минбаъдаи робитаҳои бародарона ва дӯстона миёни мардумони ду кишвар изҳор намуданд.

Акс: Вазорати корҳои хориҷии Ҷумҳурии Тоҷикистон