Душанбе, 01 декабр, – АИ «Корвон Иттилоот». Дар ҷаласаи 11-уми Шӯрои иҷроияи Форуми шаҳрдорони Осиё қарор қабул гардид, ки шаҳри Душанбе ҳамчун пойтахти фарҳангии Осиё дар соли 2026 эълон шавад.

Ин қарор нақши афзояндаи пойтахти Тоҷикистонро ҳамчун маркази муколамаи байнифарҳангӣ, рушди муосири шаҳрӣ ва дипломатияи фарҳангӣ боз ҳам равшантар мекунад. Солҳои охир Душанбе ташаббусҳои зиёдеро дар соҳаҳои санъат, ҳунарҳои эҷодӣ, театр, кино ва меъморӣ амалӣ намуда, ба яке аз марказҳои босуръат рушдёбандаи фарҳангӣ дар минтақа табдил ёфтааст.

Симои нави «Пойтахти фарҳангии Осиё» барои Душанбе имкониятҳои тозаи ҳамкориҳои байналмилалӣ, баргузории фестивалҳо, намоишгоҳҳо, форумҳо ва лоиҳаҳои бузургро фароҳам меорад, ки ба таҳкими робитаҳои фарҳангӣ байни кишварҳои қитъа равона мешаванд.

Ин эътироф на танҳо дастовардҳои мавҷудаи пойтахтро таъкид мекунад, балки барои такмили минбаъдаи сиёсати фарҳангии шаҳр низ ангезаи ҷиддӣ мебахшад.

Қарори Форуми шаҳрдорони Осиё мавқеи Душанберо дар харитаи фарҳангии қитъа боз ҳам баландтар бардошта, саҳми Тоҷикистонро дар муаррифии ҳувияти фарҳангии осиёӣ дар арсаи байналмилалӣ тақвият медиҳад.

АКС: Телеграмм канали Рустами Эмомалӣ