Душанбе, 03 декабр, – АИ «Корвон Иттилоот». Сафорати Ҷумҳурии Мардумии Чин дар Тоҷикистон аз кормандони корхонаҳои чинӣ даъват намудааст, ки аз минтақаҳои ҳаммарз бо Афғонистон фавран хориҷ шаванд. Дар ин бора Global Times бо истинод ба паёми дипломатҳои чинӣ хабар дод.

Ин тавсия баъди ду ҳамлаи мусаллаҳона, ки 26 ва 30 ноябр аз қаламрави Афғонистон рух доданд ва боиси ҳалокати панҷ шаҳрванди Чин ва ҷароҳат бардоштани панҷ нафари дигар гардиданд, содир шудааст.

Дар паёми Сафорат таъкид мешавад, ки ҳамаи шаҳрвандони Чин дар Тоҷикистон бояд аз сафар ба ноҳияҳои наздисарҳадӣ худдорӣ намоянд, қоидаҳои амниятиро риоя кунанд ва дар ҳолатҳои фавқулода омодаи иртибот бо мақомоти дахлдор бошанд.

Ба иттилои Global Times, ин огоҳӣ дар саҳифаи WeChat-и Сафорат нашр шудааст, гарчанде ки дар сомонаи расмии он чунин паём пайдо нашудааст.

Намояндагии дипломатӣ ҳамчунин хотиррасон кардааст, ки дар ҳолати фавқулода шаҳрвандон бояд бо мақомоти корҳои дохилӣ дар маҳал тамос гиранд ва барои гирифтани ёрӣ ба Сафорати Чин муроҷиат кунанд.

Чанд рӯз пеш ҷониби Чин аз сохторҳои дахлдори Тоҷикистон хоста буд, ки барои ҳифзи корхонаҳо ва шаҳрвандони чинӣ дар қаламрави ҷумҳурӣ чораҳои заруриро амалӣ намоянд. Пекин таъкид кардааст, ки интизор дорад Душанбе ба таври тез ва муассир чораҳои амниятиро пурзӯр кунад.

26 ва 30 ноябр ду ҳамла аз ҷониби қаламрави Афғонистон алайҳи шаҳрвандони Чин дар Тоҷикистон рух дод. Ҳадафи ҳамлаҳо коргароне буданд, ки дар иншооти иқтисодӣ дар минтақаҳои наздисарҳадӣ фаъолият мекарданд.

1 декабр Президенти Тоҷикистон Эмомалӣ Раҳмон бо роҳбарони ниҳодҳои қудратӣ ҷаласаи корӣ баргузор намуда, «амалҳои ғайриқонунӣ ва иғвоангези шаҳрвандони Афғонистон»-ро маҳкум кард ва дастур дод, ки тадбирҳои қатъӣ барои пешгирии ҳодисаҳои монанд андешида шаванд.

АКС: 8am.media    марзи  Тоҷикистону – Афғонистон