Душанбе, 03 декабр, – АИ «Корвон Иттилоот». 1 декабр дар шаҳри Маскав вохӯрии кории Вазири корҳои дохилии Ҷумҳурии Тоҷикистон Рамазон Раҳимзода бо Вазири корҳои дохилии Федератсияи Русия Владимир Колоколтсев баргузор гардид. Тибқи иттилои маркази матбуоти ВКД Тоҷикистон, ҷонибҳо самтҳои калидии ҳамкориро дар соҳаи амният ва тартиботи ҳуқуқӣ мавриди баррасӣ қарор доданд.

Дар ҷараёни мулоқот масъалаҳои зерин, ки барои ҳар ду кишвар аҳамияти стратегӣ доранд, баҳс шуданд:

• мубориза бо терроризм ва экстремизм,
• муқовимат ба муомилоти ғайриқонунии маводи мухаддир,
• ҷустуҷӯ, боздошт ва истирдоди ҷинояткорон,
• масъалаҳои марбут ба муҳоҷирати меҳнатӣ,
• беҳтар намудани вазъи ҳуқуқии шаҳрвандони Тоҷикистон дар Русия.

Ҷонибҳо ҳамчунин ба зарурати ҳамоҳангсозии бештари фаъолияти мақомоти ҳифзи ҳуқуқ дар шароити афзоиши хатарҳои минтақавӣ ва таҳкими механизмҳои муштараки посух додан таъкид карданд.

Дар анҷоми вохӯрӣ вазирон омодагии худро барои густариши минбаъдаи ҳамкорӣ ва роҳандозии барномаҳои нави дуҷониба дар соҳаи таъмини амният изҳор намуданд.

АКС: Вазорати  корҳои дохилии Ҷумҳурии Тоҷикистон аз бойгонӣ