Душанбе, 22 декабр, 2025 – АИ «Корвон Иттилоот». 20 декабр дар шаҳри Токио Форуми тиҷоратии «Осиёи Марказӣ + Ҷопон» баргузор гардид, ки ба минбари муҳими таҳкими ҳамкории иқтисодӣ, тиҷоратӣ ва сармоягузорӣ миёни кишварҳои Осиёи Марказӣ ва Ҷопон табдил ёфт.
Дар кори форум Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, Сарвазири Ҷопон, сарони дигар давлатҳои Осиёи Марказӣ, инчунин намояндагони ҳукуматҳо ва доираҳои соҳибкорӣ иштирок намуданд.
Ҳадафи асосии баргузории форум таҳкими минбаъдаи муносибатҳои иқтисодӣ, тиҷоратӣ ва сармоягузорӣ миёни кишварҳои Осиёи Марказӣ ва Ҷопон бо таваҷҷуҳи махсус ба самтҳои афзалиятнок — рушди «сабз» ва устуворӣ, рақамикунонӣ, молия, рушди зарфияти инсонӣ ва ташаккули низоми иҷтимоии мусоид барои тиҷорат муайян гардид.
Ин равиш инъикоси дарки муштараки зарурати мутобиқсозии иқтисодиёти минтақа ба чолишҳои нави ҷаҳонӣ ва ҷустуҷӯи моделҳои дарозмуддати рушд мебошад.
Дар интиҳои кори форум Сарвазири Ҷопон хонум Санаэ Такаичи суханронӣ намуда, сарони давлатҳо ва намояндагони доираҳои соҳибкории кишварҳоро хайрамақдам гуфт ва аҳамияти густариши ҳамкории амалӣ ва судманди мутақобиларо таъкид намуд.
Дар доираи сафари расмии Президенти Ҷумҳурии Тоҷикистон ба Ҷопон аз рӯи натиҷаи мулоқоту музокирот як қатор санадҳои нави ҳамкорӣ ба имзо расиданд, ки барои рушди муносибатҳои дуҷониба аҳамияти стратегӣ доранд.
Аз ҷумла:
- Изҳороти муштараки Ҷумҳурии Тоҷикистон ва Ҷопон оид ба рушди минбаъдаи муносибатҳо ҷиҳати эҷоди ҳамкории мутақобилан судманд;
- Созишнома миёни Ҳукумати Ҷумҳурии Тоҷикистон ва Ҳукумати Ҷопон дар бораи ҳавасмандгардонӣ ва ҳифзи мутақобилаи сармоягузорӣ;
- Ёддошти тафоҳум миёни Вазорати саноат ва технологияҳои нави Ҷумҳурии Тоҷикистон ва Вазорати иқтисод, савдо ва саноати Ҷопон дар соҳаи саноат;
- Барномаи ҳамкорӣ миёни Вазорати корҳои хориҷии Ҷумҳурии Тоҷикистон ва Вазорати корҳои хориҷии Ҷопон барои солҳои 2026–2028;
- Ёддоштҳои табодулӣ ва Созишномаи грантӣ оид ба лоиҳаи таҷдиди таҷҳизоти сканкунии борҳо дар гузаргоҳи гумрукии ноҳияи Спитамен дар масири нақлиёти байналмилалии Транскаспий;
- Созишномаи грантӣ оид ба лоиҳаи «Бунёди зеристгоҳи барқии 220 кВ барои шаҳри Душанбе»;
- Ёддошти тафоҳум миёни Вазорати нақлиёти Ҷумҳурии Тоҷикистон ва Вазорати замин, инфрасохтор, нақлиёт ва сайёҳии Ҷопон;
- Ёддошти тафоҳум миёни Вазорати кишоварзии Ҷумҳурии Тоҷикистон ва Вазорати кишоварзӣ, хоҷагии ҷангал ва моҳидории Ҷопон оид ба ҳамкорӣ дар соҳаи кишоварзӣ;
- Ёддоштҳои табодулӣ оид ба лоиҳаи таҳкими низоми коҳиши хатари офатҳои табиӣ дар минтақаи Осиёи Марказӣ ва Ҷумҳурии Тоҷикистон тавассути Барномаи рушди СММ дар Тоҷикистон.
Дар ҳошияи Форуми минтақавии тиҷоратии «Осиёи Марказӣ + Ҷопон» ва форуми тиҷоратии Тоҷикистону Ҷопон низ як қатор санадҳои нави ҳамкорӣ ба имзо расиданд. Аз ҷумла:
- Ёддошти тафоҳум миёни Агентии инноватсия ва технологияҳои рақамии назди Президенти Ҷумҳурии Тоҷикистон ва ширкати Masui Co., Ltd;
- Ёддошти тафоҳум миёни Вазорати саноат ва технологияҳои нави Ҷумҳурии Тоҷикистон ва ширкати Curtis Creek Co., Ltd. дар самти пешбурди содироти маҳсулоти нассоҷии Тоҷикистон;
- Ёддошти тафоҳум миёни Вазорати энергетика ва захираҳои оби Ҷумҳурии Тоҷикистон ва Маркази муҳандисии метеорологии Ҷопон;
- Ёддошти тафоҳум миёни Донишгоҳи техникии Тоҷикистон ба номи академик М.С. Осимӣ ва ширкати Splice-Lab Co., Ltd. дар самти омода намудани муҳандисони маҳаллӣ дар соҳаи сохтмони пулҳо;
- Ёддошти тафоҳум миёни Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва корпоратсияи ҷопонии Sansei Corporation барои қабули мошинҳои мобилии тиббӣ.
Дар маҷмуъ, аз рӯи натиҷаи сафари расмии Президенти Ҷумҳурии Тоҷикистон ба Ҷопон наздики 20 санади нави ҳамкорӣ ба имзо расид, ки гувоҳи ворид гардидани муносибатҳои Тоҷикистону Ҷопон ба марҳалаи нави сифатан баланд ва дорои мазмуни мушаххаси иқтисодию сармоягузорӣ мебошад.
АКС: Хадамоти матбуоти Президенти Ҷумҳурии Тоҷикистон