Душанбе, 25 декабр, 2025 – АИ «Корвон Иттилоот». Дар пойтахти Ҷумҳурии Исломии Покистон маросими бошукӯҳи ифтитоҳи Рӯзҳои фарҳанги Ҷумҳурии Тоҷикистон баргузор гардид. Ин чорабинии муҳими фарҳангӣ 18 декабр дар бинои Шӯрои миллии санъати Покистон доир шуда, намояндагони мақомоти расмӣ, корпуси дипломатӣ, аҳли фарҳанг ва ҷомеаи шаҳрвандиро гирди ҳам овард.
Иштироки Президенти Ҷумҳурии Исломии Покистон муҳтарам Осиф Али Зардари ба ин чорабинӣ аҳамияти хос бахшид ва сатҳи баланди муносибатҳои Тоҷикистону Покистон, инчунин таваҷҷуҳи роҳбарияти Покистонро ба густариши ҳамкориҳои фарҳангӣ бо Тоҷикистон бозгӯ намуд.
Пеш аз оғози барномаи консертӣ дар се толори марказ намоишгоҳи фарогир ташкил гардид, ки меҳмононро бо мероси ғании фарҳангии Тоҷикистон ошно сохт. Дар он намунаҳои ҳунарҳои мардумӣ ва санъати амалӣ, таомҳои миллӣ ва маҳсулоти нонӣ, меваҷот, оши палов, маҳсулоти ватанӣ, асарҳои рассомӣ ва аксҳо ба намоиш гузошта шуданд.
Намоишгоҳ марҳилаҳои муҳими таърихи кишвар, анъана ва расму ойинҳо, дастовардҳои давраи истиқлолият ва табиати нотакрори Тоҷикистонро инъикос намуда, таваҷҷуҳи зиёди тамошобинонро ҷалб кард.
Дар суханронии худ Президенти Покистон муҳтарам Осиф Али Зардари муносибатҳои дӯстона, устувор ва гуногунҷанбаи байни ду давлатро таъкид намуда, саҳми Президенти Ҷумҳурии Тоҷикистонро дар рушду таҳкими ҳамкориҳои дуҷониба, аз ҷумла дар соҳаҳои фарҳангӣ ва гуманитарӣ, махсус зикр кард.
Барномаи фарҳангӣ бо консерти бошукӯҳ бо иштироки ҳунармандони маъруфи тоҷик, ансамбли асбобҳои миллии мусиқӣ ва дастаҳои рақсӣ идома ёфт. Оҳангҳо, сурудҳо ва рақсу ҳаракатҳои миллӣ меҳмононро мафтун сохта, фарҳанги асили тоҷикро ба таври равшан муаррифӣ намуданд.
Рӯзҳои фарҳанги Ҷумҳурии Тоҷикистон дар Покистон идома доранд ва ҳадафи онҳо тақвияти робитаҳои фарҳангӣ, таҳкими дӯстии мардумон ва густариши муколамаи байнифарҳангӣ миёни ду кишвар мебошад.
Шоми 20 декабр дар шаҳри Исломободи Ҷумҳурии Исломии Покистон барномаи консертии муштараки ҳунармандони Тоҷикистону Покистон баргузор гардид.
Чорабинӣ дар Маркази мероси фарҳангии халқии Lok Virsa — яке аз муассисаҳои муҳими ҳифз ва тарғиби фарҳанги миллӣ дар Покистон — доир шуд.
Ин барномаи фарҳангӣ дар доираи Рӯзҳои фарҳанги Ҷумҳурии Тоҷикистон дар Покистон баргузор гардида, аз ҷониби тамошобинони покистонӣ бо гармию эҳтиром истиқбол ёфт. Ҳунарнамоии муштараки санъаткорони ду кишвар ба таври возеҳ наздикии анъанаҳои фарҳангӣ, ғановати мероси мусиқӣ ва сатҳи баланди таваҷҷуҳи мутақобиларо ба фарҳанги миллӣ нишон дод.
Дар барномаи консертӣ асарҳои мусиқии мардумӣ ва эстрадии тоҷикӣ ва покистонӣ, навозиши асбобҳои суннатӣ, сурудҳо ва композитсияҳои рақсӣ иҷро гардиданд. Ҳунармандон фазои муколамаи зиндаи фарҳангиро ба вуҷуд оварданд, ки ҳар як оҳанг ва иҷрои саҳнавӣ дар дили тамошобинон таъсири амиқ гузошт.
Тавре Маркази матбуоти Вазорати фарҳанги Ҷумҳурии Тоҷикистон хабар медиҳад, ин барномаи консертӣ на танҳо як рӯйдоди дурахшони фарҳангӣ, балки қадами муҳиме дар роҳи таҳкими робитаҳои гуманитарӣ миёни Тоҷикистону Покистон ба шумор меравад ва ба густариши ҳамкориҳои фарҳангӣ мусоидат мекунад.
Коршиносон таъкид менамоянд, ки чунин лоиҳаҳои муштарак дар рушди дипломатияи фарҳангӣ нақши муҳим дошта, ба мардумон имконият медиҳанд, ки тавассути забони санъат ва анъанаҳо якдигарро беҳтар бишиносанд.
АКС: Вазорати фарҳанги Тоҷикистон