Душанбе, 25 декабр, 2025 – АИ «Корвон Иттилоот».  Дар шароити афзоиши хатарҳои фаромарзӣ ва мураккаб гардидани таҳдидҳои амнияти миллӣ дар Тоҷикистон тақвияти ҳамкории байниидоравии сохторҳои марбута аҳамияти махсус касб мекунад. Дар ин замина ҳамоҳангсозии талошҳо ҷиҳати муқовимат ба муомилоти ғайриқонунии маводи кимиёвӣ, биологӣ, радиатсионӣ ва ҳастаӣ аҳамияти калидӣ дорад.

Директори Агентии амнияти кимиёвӣ, биологӣ, радиатсионӣ ва ҳастаии Академияи миллии илмҳои Тоҷикистон Илҳом Мирсаидзода ва Фармондеҳи Қӯшунҳои сарҳадии Кумитаи давлатии амнияти миллии Ҷумҳурии Тоҷикистон генерал-лейтенант Муродалӣ Раҷабзода масъалаҳои таҳкими ҳамкории соҳавӣ ва густариши ҳамкории амалӣ را баррасӣ намуданд.

Дар ҷараёни мулоқот ба афзоиши таҳдидҳои фаромарзӣ, ки бо муомилоти ғайриқонунии маводи кимиёвӣ, биологӣ, радиатсионӣ ва ҳастаӣ, ҷузъҳо ва прекурсорҳои онҳо, ҳамчунин маводи мухаддир аз минтақаҳои наздисарҳадӣ вобастаанд, таваҷҷуҳи хос зоҳир гардид. Таъкид шуд, ки муқовимат ба чунин хатарҳо муносибати низомманд, илмӣ ва бо таҷҳизоти муосир муҷаҳҳазро талаб мекунад.

Ҷонибҳо масъалаҳои омодасозӣ ва баланд бардоштани сатҳи касбии ҳайати шахсии Қӯшунҳои сарҳадӣ–ро дар соҳаи ҳифзи радиатсионӣ, кимиёвӣ ва биологӣ мавриди муҳокима қарор доданд. Зарурати истифодаи усулҳои муосири ошкорсозӣ, шиносоӣ ва вокуниш ба таҳдидҳо, инчунин омодагӣ ба ҳолатҳои фавқулода таъкид гардид.

Ҳамзамон ба таҷҳизонидани инфрасохтори сарҳадӣ бо воситаҳои техникии муосири назорат ва мониторинг — аз ҷумла дастгоҳҳои сайёри назорати радиатсионӣ, муайянкунии маводи кимиёвӣ ва скрининги биологӣ — аҳамияти махсус дода шуд. Масъалаи таҳияи роҳҳои маҷмӯии ошкорсозии маводи мухаддир ва пайвастагиҳои хатарноки кимиёвӣ дар гузаргоҳҳои сарҳадӣ ва минтақаҳои наздисарҳадӣ баррасӣ гардид.

Самти муҳими ҳамкорӣ инчунин такмили пойгоҳи таълимӣ-методӣ ва барномаҳои омӯзишӣ бо дарназардошти хусусияти марзи Ҷумҳурии Тоҷикистон бо Ҷумҳурии Исломии Афғонистон муайян карда шуд. Дар ин замина баргузории машқҳои муштарак, тактикӣ ва симулятсионӣ барои баланд бардоштани омодагии оперативии воҳидҳо муҳим арзёбӣ гардид.

Агентии амнияти кимиёвӣ, биологӣ, радиатсионӣ ва ҳастаӣ омодагии худро барои расонидани кӯмаки ҳамаҷонибаи илмӣ-методӣ, коршиносӣ ва таълимӣ ба Қӯшунҳои сарҳадӣ изҳор намуда, аҳамияти ҷалби мутахассисони миллӣ ва байналмилалӣ ва истифодаи таҷрибаи пешқадами ҷаҳониро таъкид кард. Ҳамкории институтсионалӣ ҳамчун омили таҳкими устувории низоми сарҳадӣ ба таҳдидҳои муосир арзёбӣ шуд.

Дар анҷом ҷонибҳо ба мувофиқа расиданд, ки дар ояндаи наздик Ёддошти ҳамкорӣ ба имзо расонанд, ки заминаи устувор барои ҳамкории дарозмуддат ва самаранок дар соҳаи амнияти миллӣ мегардад.

АКС: Агентии амнияти кимиёвӣ, биологӣ, радиатсионӣ ва ҳастаии Академияи миллии илмҳои Тоҷикистон