Душанбе, 27 декабр, 2025г. – АИ «Корвон Иттилоот». Сафари кории Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба вилояти Хатлон боз як бори дигар нишон дод, ки сиёсати давлатии рушд дар сатҳи маҳаллӣ чӣ гуна амалӣ мегардад — тавассути таъсиси корхонаҳои нав, бунёди иншооти иҷтимоӣ, рушди инфрасохтор ва дастгирии иқтисоди воқеӣ.

Сафари Пешвои миллат ба ноҳияи Ҷайҳун бо ба истифода додани корхонаи коркарди маҳсулоти ширии ҶДММ «Шири Ҷайҳун», ки дар заминаи ҶСК «Комбинати шири Душанбе» таъсис ёфтааст, оғоз гардид. Корхонаи нав зиёда аз даҳ намуди маҳсулот, аз ҷумла қаймоқ, ҷурғот, творог, кефир, кефири мевагӣ, дуғоб ва равған истеҳсол менамояд.

 Корхона бо хатти муосири истеҳсолӣ таъмин буда, ба таъмини бозори дохилӣ бо маҳсулоти табиӣ ва аз ҷиҳати экологӣ тоза равона шудааст. Татбиқи лоиҳа натиҷаи роҳнамоиҳои созандаи Сарвари давлат ва ташаббуси соҳибкори ватанӣ Наврӯз Комилов мебошад.

Дар ҷараёни ин сафари корӣ дар ноҳия ва минтақаҳои ҳамҷавор тақрибан 60 иншоот мавриди истифода қарор мегиранд ва сохтмони 7 иншооти нав оғоз меёбад. 

Танҳо дар соҳаи маориф 18 муассисаи таҳсилоти умумӣ барои 13 700 хонанда дар ду баст ва 10 муассисаи томактабӣ барои 1 500 кӯдак ба истифода дода мешаванд. Ҳамчунин 8 корхонаи саноатӣ бо таъсиси тақрибан 600 ҷойи корӣ ифтитоҳ мегарданд. 

Дар соли ҷорӣ бо саҳми соҳибкорон ва шаҳрвандони саховатманд 546 километр роҳҳо таъмиру навсозӣ шудаанд.

Дар доираи чорабиниҳои созандагӣ бинои нави Кумитаи иҷроияи Ҳизби Халқии Демократии Тоҷикистон дар ноҳияи Ҷайҳун, ки ба истиқболи 35-солагии Истиқлолияти давлатии Ҷумҳурии Тоҷикистон бунёд ёфтааст, мавриди истифода қарор гирифт.

 Бинои муосир бо утоқҳои корӣ, китобхона, толори маҷлис ва шароити зарурӣ барои қабули шаҳрвандон имкониятҳои фаъолияти ҳизбиро ба сатҳи нав бардошт.

Яке аз иншооти муҳими соҳаи иҷтимоӣ муассисаи таҳсилоти умумии № 53 мебошад, ки барои 1 300 хонанда дар ду баст пешбинӣ шудааст. 

Мактаб дорои 28 синфхона, толорҳои фарҳангӣ ва варзишӣ, ошхона, китобхона ва нуқтаи тиббӣ буда, ба ифтихори ҷашни истиқлол бунёд шудааст.

Ҳамзамон аз ҳамин ҷо Президенти кишвар дар реҷаи фосилавӣ 16 иншооти соҳаи маориф ва 3 корхонаи саноатӣ-ро дар ноҳияҳои гуногуни вилояти Хатлон ба истифода дод. Ин иқдомҳо бозгӯкунандаи онанд, ки маориф ва саноатикунонии босуръат аз самтҳои афзалиятноки сиёсати давлатӣ ба шумор мераванд.

Дар доираи ҳадафи чоруми стратегӣ — саноатикунонии босуръати кишвар, корхонаҳои нави истеҳсолӣ, аз ҷумла заводи шифер, корхонаҳои коркарди пахта дар ноҳияҳои Дусти ва Панҷ мавриди истифода қарор гирифтанд.

Дар анҷоми сафар Пешвои миллат аз намоишгоҳи маҳсулоти кишоварзӣ дидан намуд. Соли ҷорӣ майдони кишти зироатҳо дар ноҳияи Ҷайҳун ба 23 284 гектар расида, ҳаҷми истеҳсолот аз рӯи ҳамаи навъҳои маҳсулот афзоиш ёфтааст. Намоишгоҳ, ки бо маҳсули заҳмати деҳқонон ва ҳунари бонувон оро ёфта буд, шаҳодати равшани истифодаи оқилонаи замин ва таҷрибаи бойи сокинони ноҳия гардид.

Бо ҷамъбасти сафар Президенти кишвар ба масъулон ва кишоварзон ҷиҳати баланд бардоштани иқтидори истеҳсолӣ, истифодаи самараноки замин, ташкили захираҳои маҳсулот ва густариши боғу токзорҳо дастуру тавсияҳои мушаххас дод.

АКСҲО: Хадамоти матбуоти Президенти Ҷумҳурии Тоҷикистон