Душанбе, 03 январ, – АИ «Корвон Иттилоот». Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон фармонҳоеро ба имзо расониданд, ки тибқи онҳо дар соли 2026 баргузории се озмуни ҷумҳуриявӣ пешбинӣ шудааст. Дар ин бора манбаи расмӣ хабар медиҳад.

Сухан дар бораи озмунҳои ҷумҳуриявии «Фурӯғи субҳи доноӣ китоб аст», «Илм — фурӯғи маърифат» ва «Тоҷикистон — Ватани азизи ман» меравад, ки ҳадафи онҳо рушди соҳаи маърифат, илм, фарҳанг ва таҳкими рӯҳияи ватандӯстӣ мебошад.

Бо санадҳои қабулшуда низомномаҳои озмунҳо, ҳайати комиссияҳои озмунӣ, ҳаҷми мукофотпулиҳо, инчунин рӯйхати адабиёти тавсиявӣ тасдиқ гардидаанд. Барои ташкил ва баргузории ин чорабиниҳо вазорату идораҳои соҳавӣ, муассисаҳои илмӣ ва фарҳангӣ, ҳамчунин мақомоти маҳаллии ҳокимияти давлатӣ ҷалб карда мешаванд.

Таъмини молиявии озмунҳо аз ҳисоби Фонди захиравии Президенти Ҷумҳурии Тоҷикистон сурат мегирад. Дар соли 2026 барои ин мақсад беш аз 26 миллион сомонӣ пешбинӣ шудааст, ки тавассути Дастгоҳи иҷроияи Президенти Ҷумҳурии Тоҷикистон бо пешниҳоди ҳисоботи ҳатмӣ оид ба истифодаи мақсадноки маблағҳо ҷудо карда мешавад.

Назорати иҷрои фармонҳои мазкур ба зиммаи муовини Сарвазири Ҷумҳурии Тоҷикистон вогузор шудааст.

АКС: НИАТ “ХОВАР”