Душанбе, 12 январ, – АИ «Корвон Иттилоот». Дар Ҷумҳурии Тоҷикистон чораҳои ҷавобгарии ҷиноятӣ барои қасд ба яке аз нодиртарин намудҳои ҳайвоноти ваҳшӣ — паланги барфӣ (барси осиёимиёнагӣ) шадидтар карда шуданд. Тағйиру иловаҳои дахлдор ба Кодекси ҷиноятии Ҷумҳурии Тоҷикистон ворид гардида, ба таҳкими ҳифзи мероси нодири биологии кишвар равона шудаанд. Дар ин бора Кумитаи ҳифзи муҳити зисти назди Ҳукумати Ҷумҳурии Тоҷикистон хабар медиҳад.

Тибқи ислоҳоти қабулшуда, моддаи 232¹ Кодекси ҷиноятии Ҷумҳурии Тоҷикистон дар таҳрири нав пешниҳод гардида, унвони он чунин аст: «Шикор, нобудсозии қасдона, инчунин ғайриқонунӣ ба даст овардан, нигоҳ доштан, интиқол ё фурӯши паланги барфӣ (барси осиёимиёнагӣ)». Пештар ин меъёр танҳо шикор ва нобудсозии қасдонаи паланги барфиро дар бар мегирифт.

Бо ин роҳ қонунгузор доираи кирдорҳои ҷиноятиро васеъ намуда, ҳифзи ҳуқуқии ин навъи нодирро дар тамоми марҳилаҳои муомилоти ғайриқонунӣ тақвият бахшид.

Дар таҳрири нав барои чунин ҳуқуқвайронкуниҳо ҷарима аз 1200 то 1800 нишондиҳандаи ҳисобӣ ё маҳрум сохтан аз озодӣ ба муҳлати то се сол пешбинӣ шудааст. Қаблан ҷарима аз 800 то 1200 нишондиҳандаи ҳисобӣ, корҳои ислоҳӣ ё маҳрумият аз озодӣ ба ҳамин муҳлат муқаррар шуда буд.

Барои такроран содир намудани кирдор ҷавобгарӣ ба маротиб сахттар шудааст: ҷарима аз 2000 то 3000 нишондиҳандаи ҳисобӣ ё маҳрумият аз озодӣ ба муҳлати аз чор то ҳашт сол, ҳамзамон бо маҳрум кардан аз ҳуқуқи ишғоли баъзе мансабҳо ё анҷом додани фаъолияти муайян ба муҳлати то панҷ сол. Пештар муҳлати ниҳоии маҳрумият аз озодӣ панҷ солро ташкил медод.

Тағйирот ҳамчунин ба моддаи 236 Кодекси ҷиноятии Ҷумҳурии Тоҷикистон — «Вайрон кардани низоми ҳудудҳо ва объектҳои махсус муҳофизатшавандаи табиӣ» дахл дорад. Тибқи ислоҳот, ҳадди зарари махсусан калон аз 300 то 500 нишондиҳандаи ҳисобӣ зиёд карда шуд, ки ин дақиқияти меъёрҳои ҷавобгариро баланд мебардорад.

Шадидтар гардидани қонунгузорӣ нишон медиҳад, ки давлат сиёсати пайгиронаеро ҷиҳати ҳифзи гуногуншаклии биологӣ ва муҳофизати намудҳои нодири ҳайвонот, ки дар экосистемаҳои кӯҳии кишвар зиндагӣ мекунанд, пеш мебарад. Паланги барфӣ ҳамчун рамзи табиати баландкӯҳи Осиёи Марказӣ зери хатари нобудшавӣ қарор дошта, таваҷҷуҳи махсуси ҳуқуқӣ ва ҷамъиятиро талаб мекунад.

Тағйироти қабулшуда на танҳо ба ҷазо додани қонуншиканон, балки ба ташаккули муносибати масъулона нисбат ба мероси табиӣ ҳамчун ҷузъи муҳими амнияти экологии миллӣ ва ҷаҳонӣ равона шудааст.

Акс: Кумитаи ҳифзи муҳити зисти назди Ҳукумати Ҷумҳурии Тоҷикистон