Душанбе, 12 январ, – АИ «Корвон Иттилоот». Моҳи сентябри соли ҷорӣ дар Ҷумҳурии Тоҷикистон Фестивали бозиҳои миллии варзишӣ баргузор мешавад — чорабинии бузурги фарҳангию варзишӣ, ки ба эҳё ва рушди намудҳои миллии варзиш равона гардидааст. Ин фестивал тибқи «Нақшаи баргузории идҳо ва ҷашнҳо, фестивалҳо, намоишгоҳҳо ва озмунҳои дорои хусусияти фарҳангию маърифатӣ ва анъанаҳои мардумӣ дар Ҷумҳурии Тоҷикистон барои соли 2026», ки бо Фармони Президенти Ҷумҳурии Тоҷикистон аз 2 январи соли 2026 тасдиқ шудааст, баргузор мегардад.

Масъулияти ташкил ва баргузории фестивал ба уҳдаи Кумитаи кор бо ҷавонон ва варзиш ва Кумитаи миллии олимпии Тоҷикистон вогузор шудааст. Дар амалисозии он федератсияҳои варзишӣ, Вазорати маориф ва илм, кумитаҳои таҳсилоти ибтидоӣ ва миёнаи касбӣ, Институти тарбияи ҷисмонӣ, телевизион ва радио, инчунин мақомоти иҷроияи ҳокимияти давлатӣ дар вилоятҳо, шаҳрҳо ва ноҳияҳо фаъолона иштирок хоҳанд кард.

Ин ҳамкории байниидоравӣ аҳамияти давлатии фестивал ва нақши онро дар ташаккули арзишҳои устувори иҷтимоӣ нишон медиҳад.

Фестивали бозиҳои миллии варзишӣ дорои якчанд ҳадафи муҳими стратегист. Аз ҷумла — эҳё ва рушди намудҳои миллии варзиш, тарбияи насли наврас дар рӯҳияи эҳтиром ба таърих ва анъанаҳои ниёгон, таҳкими тарзи ҳаёти солим, ташаккули ҳисси худшиносӣ ва худогоҳии миллӣ.

Ҳамзамон ба пешгирии зуҳуроти номатлуб дар байни наврасон ва ҷавонон, боло бурдани ҳушёрии сиёсӣ ва ҷалби ҷавонон ба фаъолияти мусбати иҷтимоӣ таваҷҷуҳи махсус зоҳир мегардад.

Ёдовар мешавем, ки аввалин Фестивали бозиҳои миллии варзишӣ — дар шакли намоишӣ — 17 сентябри соли 2016 дар шаҳри Душанбе дар доираи мусобиқаҳои ҷумҳуриявӣ оид ба гӯштини миллӣ бахшида ба 25солагии Истиқлоли давлатии Ҷумҳурии Тоҷикистон баргузор гардида буд. Чорабинӣ бо мусоидати Президенти Федератсияи футболи Тоҷикистон, Раиси шаҳри Душанбе муҳтарам Рустами Эмомалӣ баргузор шуд.

Он замон фестивал 8 намуди мусобиқаи варзиширо дар бар мегирифт: гӯштини миллии анъанавӣ, поло, шиноварӣ, вазнбардорӣ (бардоштани гира), армрестлинг, давидан ба масофаҳои 200, 400 ва 800 метр, шатранҷ ва кашидани арқан.

Илова бар ин, 10 намуди бозиҳои намоишии миллӣ — аз ҷумла ҷанги хурӯсҳо, чиликдангал, ланкабозӣ, бозии устухон, тирпарронӣ аз камон, шамшербозӣ, тирпарронӣ аз фалахмон, партофтани санг аз фалахмон, хойталак ва парвоз додани бодпаракҳо — дар сатҳи шаҳрҳо ва ноҳияҳои ҷумҳурӣ пешниҳод гардида буданд.

Баргузории фестивал дар соли 2026 ҳамчун идомаи сиёсати пайгиронаи ҳифзи мероси ғайримоддии фарҳангӣ ва таҳкими робитаи наслҳо тавассути варзиш ва анъанаҳои мардумӣ арзёбӣ мешавад. Бозиҳои миллии варзишӣ на танҳо воситаи тарбияи ҷисмонӣ, балки унсури муҳими ҳувияти фарҳангӣ ва интиқолдиҳандаи арзишҳои таърихӣ ва маънавии халқ мебошанд.

Акс: сhttps://www.youtube.com/ Ховалинг 2025