Душанбе, 12 январ, – АИ «Корвон Иттилоот». 11 январ дар пойтахт бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва ҳамкории Мақомоти иҷроияи ҳокимияти давлатии ноҳияи Синои шаҳри Душанбе аксияи муҳими тозагию хуррамгардонӣ баргузор шуд. Чорабинӣ бо мақсади таҷлил аз 35-умин солгарди истиқлолияти давлатӣ таҳти унвони “Саҳми ман дар шаҳри ман” амалӣ гардид.

Дар аксия масъулини Бахши кор бо ҷавонон ва варзиши ноҳияи Фирдавсӣ, аъзоёни Иттифоқи ҷавонони Тоҷикистон, волонтёрони бахш ва экологӣ, аъзоёни Ташкилоти ҷамъиятии Пайравони Пешвои Миллат ва ҷавонони фаъолу ташаббускор фаъолона ширкат варзиданд.

Иштирокчиён бо рӯҳияи баланди ҳамбастагӣ ва масъулияти шаҳрвандӣ соҳили дарёи Душанбе ва атрофи онро аз партов ва ашёҳои заҳролуд пок карданд, қадамҳои муштараки онҳоро ҳамчун намунаи ҳусни ҳамкорӣ ва ғамхорӣ ба муҳити зист метавон арзёбӣ намуд. Гузаронидани чунин иқдомҳо на танҳо ба беҳтар кардани муҳити экологии пойтахт мусоидат мекунад, балки ба тарбияи масъулияти шаҳрвандӣ ва фарҳанги экологӣ дар байни ҷавонон низ таъсири назаррас дорад.

Ташкилкунандагон таъкид карданд, ки чунин чорабиниҳо ҷузъи ҷудонашавандаи сиёсати иҷтимоӣ ва тарбиявии Кумитаи кор бо ҷавонон ва варзиши Тоҷикистон буда, ҷавононро ба фаъолиятҳои созанда ва эҳтиром ба шаҳр ҷалб мекунанд. Аксияи имрӯза бо иштироки зиёди ҷавонон ва волонтёрон намунаи равшани ҳамбастагӣ ва эҳтироми наврасон ва ҷавонон ба шаҳри худ гардид.

Дар фарҷом, чунин иқдомҳо на танҳо ободонии муҳити шаҳриро таъмин мекунанд, балки ба ташаккули ҳисси ватандӯстӣ ва масъулияти шаҳрвандӣ дар насли нав низ мусоидат менамоянд ва ҳамчун ҷузъи муҳими таҷлили 35-солагии истиқлолияти давлатӣ арзёбӣ мешаванд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон