Душанбе, 12 январ, – АИ «Корвон Иттилоот». 10 январ Вазорати фарҳанги Ҷумҳурии Тоҷикистон дар Театри давлатии академии опера ва балети ба номи Садриддин Айнӣ Маросими қадрдонии вазорату идораҳо, ташкилоту муассисаҳо, мақомоти иҷроияи ҳокимияти давлатӣ ва кормандони соҳаи фарҳанг ва санъат баргузор намуд.

АКС: Сатториён Матлубахон Амонзода – Вазири фарҳанги Ҷумҳурии Тоҷикистон

Дар маросим дастоварду натиҷаҳои назарраси ҳамкории Вазорати фарҳанг бо мақомоти давлатӣ, муассисаҳои фарҳангӣ ва ташкилоту созмонҳои гуногун дар баргузории чорабиниҳои сатҳи ҷумҳуриявӣ ва байналмилалӣ дар соли 2025 баҳо дода шуд. Ҳадафи чорабинӣ таъкид ба саҳми фаъолона ва саҳмгузории кормандон ва ташкилотҳо дар рушду пешрафти фарҳанг ва санъати миллӣ буд.

Дар маросим иштирокчиён бо рӯҳияи баланди ҳамбастагӣ ва шодмонӣ қадрдонӣ ва сипосгузорӣ карда шуданд. Вазорат таъкид намуд, ки ҳамкории мунтазам бо мақомоти давлатӣ ва ташкилотҳои ҷамъиятӣ заминаи рушди фарҳанг, тарбияи ҳунарманди ҷавон ва таблиғи санъати миллӣ ба сатҳи байналмилалӣ мебошад.

Чорабинӣ намунаи равшани қадршиносӣ ба эҷодкорӣ, саҳм ва меҳнати соҳа дар рушду густариши фарҳанг ва санъати тоҷик буд.

Акс: Радиои “Садои Душанбе”