Душанбе, 15 январ, – АИ «Корвон Иттилоот». Донишгоҳи давлатии омӯзгории Тоҷикистон ба номи Садриддин Айнӣ (ДДОТ) ба натиҷаи бесобиқа дар таърихи таҳсилоти олии кишвар ноил гардида, ба даҳгонаи беҳтарин донишгоҳҳои ҷаҳон шомил шуд. Ин донишгоҳ дар раддабандии байналмилалии Higher Education Ranking 2025 Edition ҷойи 8-умро ишғол намуд, ки барои низоми маорифи олии Тоҷикистон дастоварди таърихӣ маҳсуб меёбад.
Ин раддабандӣ аз ҷониби лоиҳаи мустақили таҳқиқотии Higher Education Ranking (HE)-и Шӯрои таъмини сифат ва арзёбии таҳсилоти олӣ (HEQAC) дар асоси таҳлили фаъолияти 422 донишгоҳ аз 55 кишвари ҷаҳон таҳия шудааст. ДДОТ бо гирифтани 8136 хол беҳтарин донишгоҳи Тоҷикистон эътироф гардида, ба гурӯҳи пешсафони ҷаҳонӣ ворид шуд.
Фарқияти асосии раддабандии HE дар он аст, ки он на танҳо ба шуҳрат ё нишондиҳандаҳои библиометрӣ, балки ба фаъолияти воқеии донишгоҳҳо такя мекунад. Дар соли 2025 арзёбӣ бар асоси 25 меъёр ва 138 нишондиҳанда сурат гирифт. Илова бар таҳсил ва илм, сатҳи идоракунӣ, байналмилалигардонӣ, рақамисозӣ, омодагии хатмкунандагон ба бозори меҳнат, шаффофияти академӣ, фарогирӣ, устувории экологӣ ва саҳм дар Ҳадафҳои рушди устувори СММ низ ба назар гирифта шуданд.
Ба ҳар як иштирокчии раддабандӣ ҳисоботи муфассали таҳлилӣ бо пешгӯӣ, таҳлили SWOT ва тавсияҳо пешниҳод гардид. Натиҷаи баланди ДДОТ самараи фаъолияти пайвастаи илмӣ-таълимӣ ва ҷорӣ намудани технологияҳои муосири таълим мебошад.
Қаблан донишгоҳ ҳамчун беҳтарин донишгоҳи инноватсионӣ ва пешрафта-и соли 2023 аз ҷониби London School of Digital Business эътироф шуда буд ва ҳоло барои ширкат дар раддабандии бонуфузи QS ва Times Higher Education омодагӣ мебинад. Имрӯз дар ДДОТ зиёда аз 5000 видеодарс аз рӯи 89 ихтисос ба чанд забон дастрас буда, дар соли 2024 ҳамаи онҳо бори аввал аз аккредитатсияи байналмилалӣ бо муҳлати панҷ сол гузаштаанд.
Дар раддабандии HE-2025 инчунин Донишгоҳи давлатии Тоҷикистон ба номи Бобоҷон Ғафуров (ҷойи 184) ва Донишгоҳи давлатии тиббии Хатлон (ҷойи 329) Тоҷикистонро намояндагӣ намуданд.
Таджикский государственный педагогический университет
Фото: с сайта tgpu.tj