Душанбе, 19 январ, – АИ «Корвон Иттилоот».  Дастаи наврасони Тоҷикистон (U-17) оид ба футбол баромадҳои муваффақонаи худро дар доираи ҷамъомади таълимию омодагӣ дар Амороти Муттаҳидаи Араб идома дода, бозии мутмаин ва баркамолро дар арсаи байналмилалӣ нишон медиҳад.

Рӯзи 16 январ дар шаҳри Дубай шогирдони тими миллӣ бозии дуюми дӯстона-и худро баргузор намуда, бо ҳамсолони худ аз тими миллии АМА рақобат карданд. Тибқи иттилои Федератсияи футболи Тоҷикистон, вохӯрӣ бо пирӯзии дастаи Тоҷикистон бо ҳисоби 1:0 анҷом ёфт.

Бо вуҷуди мақоми дӯстона доштани бозӣ, рақобат бо шиддати баланд ва муборизаи ҷиддӣ сурат гирифт. Голаи ягона натиҷаи мантиқии ҳамкории хуби даставӣ, интизом ва тамаркузе буд, ки футболбозони тоҷик дар тамоми бозӣ нигоҳ доштанд.

Бояд таъкид кард, ки ҷамъомади таълимию омодагӣ дар Дубай барои тими наврасони Тоҷикистон аҳамияти муҳими стратегӣ дорад. Даста таҷрибаи байналмилалии арзишманд ба даст оварда, ба сабкҳои гуногуни бозӣ ва шароити мухталиф мутобиқ мешавад, ки ин дар марҳилаи ташаккули захираи ояндаи тими миллӣ ниҳоят муҳим аст.

Қаблан, дар бозии аввали дӯстона дар ҳамин ҷамъомад, тими наврасони Тоҷикистон (U-17) бо дастаи Арабистони Саудӣ бо ҳисоби 1:1 мусовӣ бозӣ намуда, дар силсилаи зарбаҳои пеналти бо ҳисоби 10:9 пирӯз шуд. Ин бозӣ низ устувории равонӣ ва рӯҳияи ҷангии футболбозони тоҷикро равшан нишон дод.

Ду бозии пайдарпай бидуни мағлубият бар зидди рақибони пурқуввати минтақаи Ховари Миёна бозгӯи он аст, ки футболи наврасони Тоҷикистон дар масири дурусти рушд қарор дорад ва талошҳо дар самти омодасозии насли ҷавони бозигарон натиҷаҳои назаррас медиҳанд.

Акс: Федератсияи футболи Тоҷикистон