Душанбе, 22 январ, – АИ «Корвон Иттилоот». Навсозии иншооти бузурги гидроэнергетикии кишвар ва ҷалби сармоягузории дарозмуддат ба соҳаи энергетика дар мулоқоти Вазири энергетика ва захираҳои оби Ҷумҳурии Тоҷикистон Далер Ҷумъа бо ҳайати Бонки сармоягузории аврупоӣ (БСА), ки имрӯз дар Душанбе баргузор гардид, дар маркази таваҷҷуҳ қарор гирифт.

Тавре аз маркази матбуоти Вазорати энергетика ва захираҳои об хабар доданд, ҷонибҳо дурнамои густариши ҳамкории судманд байни Тоҷикистон ва Бонки сармоягузории аврупоиро мавриди баррасӣ қарор дода, ба масъалаҳои маблағгузорӣ ва татбиқи лоиҳаҳои инфрасохтории соҳаи энергетика аҳамияти махсус доданд.

Дар ҷараёни мулоқот лоиҳаҳое мавриди муҳокима қарор гирифтанд, ки аҳамияти стратегии мустақим барои амнияти энергетикии кишвар доранд. Аз ҷумла, сохтмони Неругоҳи барқи обии Роғун, навсозии неругоҳҳои «Норак» ва «Қайроққум», ҳамчунин татбиқи лоиҳаи минтақавии CASA-1000, ки ба содироти неруи барқ ва тақвияти ҳамгироии энергетикӣ дар Осиёи Марказӣ ва Ҷанубӣ равона шудааст.

Ба андешаи коршиносон, навсозии неругоҳҳои мавҷуда имкон медиҳад, ки боэътимодии кори онҳо баланд бардошта шуда, самаранокии истифодаи иқтидорҳо афзоиш ёбад ва мӯҳлати хизматрасонии таҷҳизот дароз гардад. Ҳамзамон, иштироки Бонки сармоягузории аврупоӣ ҳамчун нишонаи эътимод ба иқтидори энергетикии Тоҷикистон ва стратегияи дарозмуддати рушди энергетикаи «сабз» арзёбӣ мегардад.

Дар анҷоми мулоқот ҷонибҳо омодагии худро ба таҳкими минбаъдаи ҳамкорӣ дар доираи лоиҳаҳои афзалиятнок ва идомаи муколамаи доимӣ дар соҳаи энергетика таъкид намуданд.

Акс: Вазорати энергетика ва захираҳои оби Ҷумҳурии Тоҷикистон