Душанбе, 26 январ, – АИ «Корвон Иттилоот». Дафтари барномаҳои Созмони амният ва ҳамкорӣ дар Аврупо (САҲА) дар Душанбе ва Вазорати корҳои дохилии Ҷумҳурии Тоҷикистон 20 январи соли 2026 Нақшаи муштараки амал-ро барои татбиқи фаъолиятҳо, чорабиниҳо ва ташаббусҳои муштарак дар давоми соли ҷорӣ ба имзо расониданд. Ин санад самтҳои калидии ҳамкориро муайян намуда, ба баланд бардоштани самаранокии фаъолияти мақомоти ҳифзи ҳуқуқ ва тақвияти ҷалби ҷомеа равона шудааст.
Нақшаи муштарак ҳамчун чорчӯбаи сохторӣ барои идомаи ислоҳоти ҷории милитсия хизмат мекунад. Дар маркази он баргузор намудани ҷаласаҳои мунтазами ҳамоҳангсозӣ барои баррасии пешрафт, таҳкими механизмҳои ҳамкорӣ бо ҷомеа ва баланд бардоштани иқтидори мақомоти корҳои дохилӣ қарор дорад. Ин ҳадафҳо тавассути омӯзишҳои мақсаднок, дастгирии техникӣ ва таъмини таҷҳизоти зарурӣ амалӣ мегарданд.
Дар ҳошияи маросими имзои санад, Дафтари барномаҳои САҲА ба Раёсати ҳифзи тартиботи ҷамъиятии Вазорати корҳои дохилӣ ва Ҷамъияти варзишии «Динамо» таҷҳизоти техникӣ ва лавозимоти варзиширо тақдим намуд. Ин иқдом ба дастгирии талошҳои ислоҳоти дохилии Вазорат ва тақвияти фаъолияти хадамоти милитсия нигаронида шудааст.
Тибқи иттилоъ, таҷҳизоти техникӣ иқтидори Раёсати ҳифзи тартиботи ҷамъиятиро барои пуштибонии фаъолияти Шӯроҳои ҷамъиятӣ дар вилояти Хатлон ба таври назаррас афзоиш медиҳад. Ҳамзамон, лавозимоти варзишӣ дар доираи маъракаҳои огоҳсозии ҷомеа, бахусус миёни ҷавонон, барои баррасӣ ва пешгирии масъалаҳои марбут ба маводи мухаддир истифода хоҳанд шуд.
Дар маросими имзои Нақшаи муштарак ва супоридани таҷҳизот полковник Толеъзода Аъзам Толиб, ҳамоҳангсози миллӣ оид ба ислоҳоти милитсия дар назди Вазорати корҳои дохилӣ, ва Мирослав Милоевич, иҷрокунандаи вазифаи роҳбари Шӯъбаи сиёсӣ-низомии Дафтари барномаҳои САҲА дар Душанбе, иштирок намуданд.
Ҷонибҳо аз сатҳи кунунии ҳамкорӣ изҳори қаноатмандӣ карда, уҳдадории худро барои таҳкими минбаъдаи шарикӣ таъкид намуданд. Ба гуфтаи онҳо, татбиқи пайгиронаи Нақшаи муштарак метавонад ба тақвияти эътимоди ҷомеа, баланд шудани самаранокии мақомоти ҳифзи ҳуқуқ ва рушди муносибатҳои устувори давлат ва шаҳрвандон мусоидат намояд.
ФОТО: OSCE Programme Office in Dushanbe