Душанбе, 26 январ, – АИ «Корвон Иттилоот». Дар шароити рушди босуръати технологияҳои рақамӣ ва тағйирёбии иқтисоди ҷаҳонӣ шаҳри Душанбе ба як майдони муҳими байналмилалӣ барои баррасии ояндаи низомҳои молиявӣ табдил меёбад. Дар пойтахти Тоҷикистон Конфронси байналмилалии аввалини «Молия ва табдили рақамӣ» кори худро оғоз намуд, ки коршиносон ва мутахассисони пешсафро аз Тоҷикистон, Русия, Қазоқистон, Чин, Ӯзбекистон ва Қирғизистон гирд овард.
Ташаббускори баргузории ин ҳамоиш Муассисаи давлатии «Пажӯҳишгоҳи илмӣ-тадқиқотии молия»-и Вазорати молияи Ҷумҳурии Тоҷикистон мебошад. Ҳадафи конфронс баррасии мушкилот ва имкониятҳои асосии рақамисозии равандҳои молиявӣ, инчунин ҷустуҷӯи роҳҳои амалии рушди устувори низомҳои молиявии миллӣ ва минтақавӣ аст.
Яке аз мавзӯъҳои калидии конфронс нақши ҳисоббаробаркуниҳои ғайринақдӣ дар иқтисоди муосир гардид. Иштирокчиён таъкид карданд, ки гузариш ба шаклҳои рақамии пардохт имрӯз на танҳо тамоюли технологӣ, балки самти стратегии рушд мебошад, ки ба шаффофияти гардиши молиявӣ, самаранокии идоракунии буҷет ва сатҳи эътимоди ҷомеа ба ниҳодҳои давлатӣ таъсири мустақим мерасонад.
Муовини Вазири молияи Ҷумҳурии Тоҷикистон Сарвар Қурбониён изҳор дошт, ки идоракунии молияи давлатӣ яке аз абзорҳои асосии татбиқи сиёсати давлатӣ ба ҳисоб меравад.
«Самаранок ташаккул ёфтан, тақсим ва истифода шудани захираҳои буҷетӣ мустақиман ба устувории иқтисодии кишвар ва сатҳи эътимоди ҷомеа вобаста аст», — зикр намуд ӯ.
Дар ин замина ҷорӣ намудани ҳисоббаробаркуниҳои ғайринақдӣ ҳамчун қадами муҳим дар самти навсозии идоракунии молиявӣ арзёбӣ мегардад, ҳарчанд давлат ва ширкатҳо дар ин раванд бо як қатор мушкилоти институтсионалӣ ва технологӣ рӯ ба рӯ мешаванд.
Дар конфронс ба дурнамои рушди бозори коғазҳои қиматнок дар шароити рақамисозӣ низ таваҷҷуҳи зиёд зоҳир гардид. Коршиносон таъсири равишҳои нав, аз ҷумла меъёрҳои ESG ва молияи исломиро ба ташаккули бозорҳои устувори молиявӣ, ҳамчунин нақши технологияҳои рақамиро дар баланд бардоштани дастрасӣ ва шаффофияти онҳо баррасӣ менамоянд.
Таъкид шуд, ки абзорҳои молиявии исломӣ, аз ҷумла вомбаргҳои исломӣ ва маҳсулоти молиявии бидуни фоиз, дар рушди бозори ҷаҳонии молия нақши муҳим доранд. Дар доираи конфронс имкониятҳои ҳамгироии ин абзорҳо ба иқтисоди рақамӣ мавриди муҳокима қарор мегиранд. Ба масъалаҳои рушди институтсионалии бозори коғазҳои қиматнок ва навовариҳо дар соҳаи молияи исломӣ диққати махсус дода мешавад.
Иштирокчиёни конфронс инчунин зикр намуданд, ки бо рушди технологияҳои нав на танҳо равишҳои баҳисобгирӣ, балки худи мафҳуми ҳисоботдиҳии молиявӣ низ тағйир меёбад. Технологияҳои муосир имконият медиҳанд, ки ҷамъоварӣ, таҳлил ва тафсири маълумоти молиявӣ ба таври нав сурат гирад, ки ин навсозии меъёрҳои танзимкунанда ва стандартҳои касбиро тақозо мекунад.
Дар поёни конфронс имзои як қатор санадҳои ҳамкорӣ миёни муассисаҳои пешбари молиявӣ ва баҳисобгирии кишварҳои иштирокчӣ дар назар аст. Ин созишномаҳо заминаи ҳамкории минбаъда ва рушди муштаракро дар самти рақамисозии равандҳои молиявӣ фароҳам хоҳанд овард.
Ташкилкунандагон умед доранд, ки конфронс дар Душанбе на танҳо ба минбари табодули таҷриба ва андешаҳо табдил меёбад, балки ба таҳияи тавсияҳои амалии ҷорӣ намудани технологияҳои рақамӣ дар соҳаи молия мусоидат намуда, ба таҳкими устувории иқтисодӣ ва шаффофияти молиявӣ хизмат мекунад.
ФОТО: АМИТ «ХОВАР»