Душанбе, 06 феврал, – АИ «Корвон Иттилоот». Тоҷикистон дар роҳи таъмини истиқлолияти энергетикӣ ва татбиқи яке аз бузургтарин лоиҳаҳои инфрасохтории минтақа қадами нав гузошт. Ҷумҳурии Тоҷикистон ва Фонди рушди Абӯ-Даби созишнома оид ба маблағгузории сохтмони Неругоҳи барқи обии Роғун-ро ба маблағи 100 миллион доллари ИМА ба имзо расониданд.
Тавре маркази матбуоти Вазорати молияи Ҷумҳурии Тоҷикистон хабар медиҳад, маросими имзои санад дар шаҳри Дубайи Амороти Муттаҳидаи Араб баргузор гардид. Созишномаро аз ҷониби Тоҷикистон Вазири молия Файзиддин Қаҳҳорзода, ва аз ҷониби Фонд — Директори генералии Фонди рушди Абӯ-Даби Муҳаммад Саиф Ал-Сувайдӣ ба имзо расониданд.
Тибқи созишнома, маблағҳои ҷалбшуда ба корҳои сохтмонӣ ва инфрасохтории Лоти 2-и НБО-и Роғун равона мегарданд. Ин марҳила яке аз бахшҳои калидии лоиҳа ба ҳисоб рафта, ба суръати пешрафти сохтмон ва ворид намудани иқтидорҳои нав таъсири мустақим мерасонад.
Неругоҳи барқи обии Роғун ҳамчун лоиҳаи дорои аҳамияти стратегии миллӣ арзёбӣ мешавад. Он на танҳо пояи амнияти энергетикии кишвар, балки омили муҳими рушди иқтисодӣ, саноат ва тавсеаи имкониятҳои содиротии неруи барқ маҳсуб меёбад.
Имзои созишнома бо Фонди рушди Абӯ-Даби сатҳи баланди эътимоди байналмилалӣ ба лоиҳаи Роғун ва сиёсати молиявию иқтисодии Тоҷикистонро тасдиқ мекунад. Ин фонд дар саросари ҷаҳон лоиҳаҳои бузурги инфрасохториро, ки ба рушди устувор нигаронда шудаанд, дастгирӣ менамояд.
Барои Тоҷикистон ҷалби сармоя аз кишварҳои Халиҷи Форс дар заминаи диверсификатсияи манбаъҳои маблағгузорӣ ва густариши ҳамкориҳои байналмилалӣ аҳамияти хоса дорад.
НБО-и Роғун яке аз бузургтарин лоиҳаҳои гидроэнергетикӣ на танҳо дар Тоҷикистон, балки дар тамоми Осиёи Марказӣ ба шумор меравад. Бо татбиқи пурраи он кишвар ба таъминоти устувори неруи барқ даст ёфта, вобастагӣ аз маҳдудиятҳои мавсимӣ коҳиш меёбад ва замина барои рушди устувори соҳаҳои марбут фароҳам мегардад.
Созишномаи баимзорасида дар Дубай пояи молиявии лоиҳаро таҳким бахшида, нишон медиҳад, ки Роғун ҳамоно дар меҳвари таваҷҷуҳи шарикон ва сармоягузорони байналмилалӣ қарор дорад.
Ёдовар мешавем, ки барои ба пуррагӣ анҷом додани сохтмони неругоҳ маблағи 6,4 миллиард доллари ИМА зарур аст.
Қаблан роҳбарияти ҷумҳурӣ хабар дода буд, ки барои идомаи сохтмони НБО «Роғун» бо шарикони рушд ба маблағи зиёда аз 2 миллиард доллар тавофуқҳо ҳосил шудаанд. Ба ин маблағҳо гранти Бонки ҷаҳонӣ ба ҳаҷми 650 миллион доллар, қарзҳои Бонки осиёии сармоягузории инфрасохтор ба маблағи 500 миллион доллар, маблағгузории Бонки исломии рушд ва фондҳои арабӣ ба ҳаҷми 450 миллион доллар, инчунин гранти Фонди рушди Қатар ба маблағи 50 миллион доллар шомиланд.
Айни замон музокирот ҷиҳати ҷалби боз 1,7 миллиард доллари дигар идома доранд.
Аз соли 2008 то имрӯз барои сохтмони ин иншооти муҳими стратегӣ аз ҳисоби буҷети давлатӣ ва дигар манбаъҳо зиёда аз 48,1 миллиард сомонӣ равона гардидааст.
Акс: Вазорати молияи Ҷумҳурии Тоҷикистон