Душанбе, 13 феврал, – АИ «Корвон Иттилоот». Муносибатҳои иқтисодии Тоҷикистону Русия дар бахши кишоварзӣ вориди марҳилаи нави амалӣ гардиданд: корхонаи муштараки кишоварзӣ бо ҳадафи содироти мунтазами маҳсулоти аграрии Тоҷикистон ба бозори Русия таъсис ёфта, пас аз гузаштан аз расмиёти бақайдгирӣ ва санҷишҳои ҳуқуқӣ расман ба фаъолият оғоз намуд.

Дар ин бора Агентии содироти назди Ҳукумати Ҷумҳурии Тоҷикистон хабар додааст. Ба арзёбии ниҳод, таъсиси сохтори муштарак имкон медиҳад, ки мавқеи Русия ҳамчун харидори асосии маҳсулоти кишоварзии Тоҷикистон таҳким ёфта, ҳамкориҳо хусусияти низомманд ва устувор касб намоянд.

Тавре аз ҷониби ширкати «Тоҷагропромэкспорт» иттилоъ доданд, корхона расман ба қайд гирифта шуда, фаъолияти худро оғоз кардааст. Номи ниҳоии он ҳанӯз тасдиқ нашудааст. Аз ҷумла, вариантҳои «Агротажтрейд», «Тоҷагро» ва «Тайтрейд» мавриди баррасӣ қарор доранд. Номи расмӣ баъд аз мувофиқа бо шарикони рус эълон хоҳад шуд.

Қаблан директори Агентии содироти Тоҷикистон Баҳриддин Сиродҷиддинзода изҳор дошта буд, ки дар сатҳи роҳбарияти ду кишвар дар мавриди таъсиси корхонаи муштарак мувофиқа ҳосил шудааст. Ба гуфтаи ӯ, ширкат ба корҳои омодагӣ ва ташкилии содироти маҳсулоти кишоварзии Тоҷикистон ба Русия машғул мегардад — аз масъалаҳои логистикӣ то ҳамоҳангсозӣ бо сохторҳои марбута.

«Бо супориши Президенти Федератсияи Русия Владимир Путин ҳамкорони руси мо аллакай ду маротиба ба Тоҷикистон сафар карданд ва мо як маротиба ба Русия рафтем. Онҳо барои кори мустақим меоянд, на танҳо барои имзои санадҳо», — таъкид намуд Сиродҷиддинзода.

Тибқи созишнома, инчунин ҷудо намудани 10 гектар замин дар ҳудуди ҷумҳурӣ барои бунёди корхона пешбинӣ шудааст. Ин иншоот ба содироти маҳсулоти кишоварзӣ ба Федератсияи Русия равона гардида, метавонад ба маркази логистикӣ ва коркарди маҳсулот табдил ёбад ва арзиши иловашударо боло барад.

Директори «Тоҷагропромэкспорт» Маруфи Абдулло низ қаблан иттилоъ дода буд, ки ҳайати ширкат дар Москва бо намояндагони Вазорати саноат ва савдои Русия, Вазорати кишоварзии Русия ва ҳамчунин ширкатҳои бузурги соҳа мулоқот анҷом додааст. Ин иқдом ба ҳамгироии маҳсулоти тоҷикӣ ба шабакаҳои тақсимоти бозори Русия ва таъмини талаботи устувор нигаронда шудааст.

Бино ба маълумоти расмӣ, дар соли 2025 ҳаҷми содироти маҳсулоти кишоварзии Тоҷикистон 79,2 миллион долларро ташкил додааст. Аз ин ҳаҷм беш аз 50 фоиз — 39,4 миллион доллар — ба бозори Русия рост меояд. Таъсиси корхонаи муштарак метавонад на танҳо ин нишондиҳандаро тақвият бахшад, балки ҳамкориҳои дуҷонибаро аз сатҳи шартномаҳои ҷудогона ба марҳилаи шарикии дарозмуддат барорад.

Дар шароити таваҷҷуҳи афзоянда ба амнияти озуқаворӣ ва диверсификатсияи таъминот дар фазои Евразия, ин лоиҳаи аграрии муштарак ҳамчун қадами саривақтӣ ва дорои аҳамияти стратегии ду кишвар арзёбӣ мешавад.

Акс: Мақомоти иҷроияи ҳокимияти давлатии вилояти Суғд