Япониялык тараптын демилгеси менен 7-ноябрда Кыргызстандын тышкы иштер министри Жээнбек Кулубаев Япониянын жаңы дайындалган тышкы иштер министри Такеши Ивая менен телефон аркылуу сүйлөштү. Бул тууралуу КР ТИМдин басма сөз кызматынан билдиришти.
Маектешүүнүн жүрүшүндө Жээнбек Кулубаев кесиптешин жогорку жана жооптуу кызматка дайындалышы менен куттуктап, ага жүктөлгөн милдеттерин аткарууда ийгиликтерди каалады.
Тараптар кыргыз-япон мамилелеринин учурдагы маселелерин талкуулап, кызматташтыкты мындан ары бекемдөө келечеги тууралуу пикир алмашышты. Эки министр тең Кыргыз Республикасынын президенти Садыр Жапаровдун 2023-ж. ноябрь айында Японияга болгон расмий сапарынын жемиштүү жыйынтыктарын белгилешти жана жетишилген макулдашууларды жана демилгелерди мындан ары ишке ашыруунун маанилүүлүгүн белгилешти.
“Борбордук Азия + Япония” диалогуна, атап айтканда, көп тараптуу өз ара аракеттенүү үчүн маанилүү аянтча катары саммитке даярданууга өзгөчө көңүл бурулду. Жээнбек Кулубаев аталган форматтын алкагында кызматташтыкты кеңейтүүнүн маанилүүлүгүн баса белгилеп, аймактык туруктуулукту бекемдөөдө жана туруктуу өнүгүүнү илгерилетүүдө анын негизги ролун белгиледи.
Жыйынтыгында Жээнбек Кулубаев Такеши Иваяны эки тараптуу кызматташтыкты тереңдетүү боюнча мындан аркы кадамдарды талкуулоо үчүн Кыргыз Республикасына расмий сапар менен келүүгө чакырды.
Эскертүү: Япониянын Тышкы иштер министри Такеши Иваянын сүрөтү Япониянын Тышкы иштер министрлигинин расмий сайтынан алынды.
Ақпарат көзі: сайт https://caravan-info.kg/