Душанбе, 23 сентябр, – АИ «Корвон Иттилоот».  Дар саросари Тоҷикистон 22 сентябр Рӯзи Рӯдакӣ таҷлил мегардад. Ин сана ба хотираи шоири бузург Абӯабдуллоҳи Рӯдакӣ (858–941), поягузори адабиёти тоҷику форс бахшида шуда, нишони ифтихори миллӣ ва худшиносии фарҳангии тоҷикон аст.

Мероси адабии Рӯдакӣ пур аз ҳикмату фалсафа буда, зиёда аз ҳазор сол сарчашмаи тарбияи маънавӣ ва намунаи санъати баланди сухан мебошад. Қасидаи машҳури ӯ «Бӯйи Ҷӯйи Мӯлиён» имрӯз ба рамзи фарҳанги миллӣ ва васфи ягонагии тоҷикон табдил ёфтааст.

Сарвари давлат муҳтарам Эмомалӣ Раҳмон борҳо таъкид намудаанд, ки Рӯдакӣ на танҳо сардафтари адабиёти классикӣ, балки чароғи маънавӣ барои наслҳои имрӯза аст, ки панду андарзҳояш то имрӯз арзиши худро гум накардаанд.

Бо пешниҳоди Тоҷикистон соли 2008 ЮНЕСКО 1150-солагии устод Рӯдакӣ-ро таҷлил намуд. Ид дар Душанбе ва як қатор пойтахтҳои ҷаҳонӣ — Москва, Ню-Йорк, Берлин, Теҳрон, Кобул ва Анқара баргузор гардида, мақоми ҷаҳонии мероси ин шоири барҷаста тасдиқ гардид.

Маърифати инсондӯстӣ, дӯстӣ ва сулҳпарварии Рӯдакӣ дар замони кунунӣ низ боиси таҳкими ахлоқ ва арзишҳои умумибашарӣ мебошад. Ҷашни Рӯзи Рӯдакӣ дар Тоҷикистон на танҳо арҷгузорӣ ба бузургтарин шоири миллати тоҷик аст, балки омили таҳкими худшиносӣ, ватандӯстӣ ва арҷгузорӣ ба таъриху фарҳанги бостонӣ низ мебошад.

АКС: аз манбаъҳои боз