Душанбе, 20 сентябр, – АИ «Корвон Иттилоот».  Ҳайати вакилони Парлумони Аврупо якҷо бо намояндагони Парлумони Ҷумҳурии Тоҷикистон аз бузургтарин иншооти энергетикии кишвар — неругоҳи барқи обии «Роғун» боздид карданд.

Зимни сафар меҳмонон бо ҷараёни корҳои сохтмонӣ ошно гардида, аҳамияти стратегӣ ва нақши иншоотро дар таъмини истиқлолияти энергетикии Тоҷикистон ва имкониятҳои содироти барқ баррасӣ намуданд.

Сардори ҳайати Парлумони Аврупо Ҷузеппина Принчи зикр кард, ки сохтмони НБО «Роғун» на танҳо як тарҳи муҳандисӣ, балки рамзи иродаи мардуми тоҷик ба рушд ва истиқлолият аст. Ба гуфтаи ӯ, ба истифода дода шудани пурраи иншоот ба рушди устувори иқтисодӣ мусоидат карда, заминаи густариши ҳамкориҳои байналмилалиро фароҳам месозад.

Мавзӯи муҳими боздид масъалаи амнияти экологӣ буд. Вакилони аврупоӣ таъкид намуданд, ки истифодаи манбаъҳои барқароршавандаи энергия, аз ҷумла гидроэнергетика, ба ҳадафҳои ҷаҳонии коҳиши партоби карбон ва гузариш ба иқтисоди «сабз» мутобиқат мекунад.

Коршиносон бар онанд, ки НБО «Роғун» на танҳо воситаи худкифоии энергетикӣ, балки имконияти муаррифии Тоҷикистон ҳамчун иштирокчии масъули ташаббусҳои байналмилалии иқлимӣ мебошад. Сохтмони ин неругоҳ мавқеи кишварро ҳамчун шарики боэътимод дар роҳи рушди устувор ва энергетикаи «сабз» тақвият мебахшад.

АКС: АМИТ «ХОВАР»