Душанбе, 10 декабр, – АИ «Корвон Иттилоот». 8 декабри соли 2025 сафири Ҷумҳурии Тоҷикистон дар Ҷумҳурии Корея, Салоҳиддин Киром, дар вохӯрии навбатии дӯстони Бунёди иқлими сабз (GCF) иштирок намуд.
Ин чорабинӣ, ки намояндагони дипломатӣ, созмонҳои байналмилалӣ ва коршиносон дар соҳаи сиёсати иқлимро муттаҳид сохт, барои муҳокимаи масоили муҳим дар самти рушди устувор ва тадбирҳои глобалӣ барои мубориза бо тағйирёбии иқлим муҳити фароҳам овард.
Дар вохӯрӣ Директори иҷроияи Бунёди иқлими сабз, хонум Мафалда Дуарте, ҳисоботи муфассал аз фаъолияти Бунёд дар соли 2025 пешниҳод намуд. Ӯ ба дастовардҳои асосии Бунёд, аз ҷумла дастгирии лоиҳаҳои коҳиш додани партови газҳои гармхонаӣ, мутобиқсозӣ ба тағйирёбии иқлим ва рушди энергияи устувор дар кишварҳои гуногун, таъкид кард.
Хонум Мафалда Дуарте ҳамчунин нақшаҳои Бунёд барои соли 2026-ро шарҳ дод ва эълон намуд, ки Ҷаласаи ояндаи Шӯрои директорони GCF дар охири моҳи июни соли 2026 дар шаҳри Душанбе баргузор хоҳад шуд. Ин чорабинӣ имконияти муҳимест барои мубодилаи таҷрибаҳо, муҳокимаи инициативаҳои нав ва тақвияти ҳамкории байналмилалӣ дар самти сиёсати иқлим.
Иштирокчиёни вохӯрӣ инчунин самтҳои стратегии Бунёдро баррасӣ намуданд, аз ҷумла густариши дастгирӣ ба кишварҳои рӯ ба рушди устувор дар соҳаи энергияи сабз, идоракунии устувори замин ва ҳифзи экосистемаҳо. Ба ҷалб намудани сармояи хусусӣ барои лоиҳаҳои иқлимӣ ва рушди барномаҳои ҳамкорӣ бо институтҳои молиявии байналмилалӣ диққати махсус дода шуд.
Сафири Тоҷикистон таъкид кард, ки иштироки фаъолонаи кишвар дар иқдомҳои глобалӣ барои мубориза бо тағйирёбии иқлим аҳамияти баланд дорад ва Ҷумҳурии Тоҷикистон омода аст дар сатҳи миллӣ татбиқи лоиҳаҳои GCF-ро дастгирӣ намояд. Ҳамзамон дар ҷараёни вохӯрӣ мубодилаи назарҳо дар бораи лоиҳаҳои оянда ва роҳҳои тақвияти ҳамкории минтақавӣ дар Осиёи Марказӣ барои баланд бардоштани устуворӣ ба хатари иқлимӣ ба миён гузошта шуд.
Ин вохӯрӣ собит намуд, ки гуфтугӯ ва ҳамкории байналмилалӣ нақши калидӣ дар ноил шудан ба ҳадафҳои рушди устувор ва таъмини амнияти иқлимӣ барои наслҳои оянда дорад.
АКС: Сафорати Тоҷикистон в Республикаи Корея