Душанбе, 24 декабр, 2025 – АИ «Корвон Иттилоот». Дар вилояти Суғди Тоҷикистон ҷиҳати баланд бардоштани устуворӣ ба хатарҳои иқлимӣ ва коҳиши таҳдидҳои вобаста ба обхезӣ тадбирҳои муҳим амалӣ мегарданд. Иттиҳоди Аврупо ва Барномаи рушди СММ (БРСММ) дар доираи лоиҳаи минтақавии «Тағйирёбии иқлим ва устуворӣ дар Осиёи Марказӣ» низоми мониторинги захираҳои об ва огоҳкунии барвақт аз обхезиро тақвият медиҳанд.

Дар доираи ин лоиҳа, ки аз ҷониби Иттиҳоди Аврупо маблағгузорӣ мешавад, таҷҳизоти махсус барои чен кардани хароҷоти оби дарёҳо, ҷӯйборҳо ва каналҳо ба Маркази гидрометеорологии вилояти Суғд, Раёсати мелиоратсия ва захираҳои об ва Ташкилоти ҳавзаи дарёи Сирдарё супорида шуд. Ин таҷҳизот имкон медиҳад, ки дақиқӣ ва суръати мушоҳидаҳои гидрологӣ ба таври назаррас беҳтар гардад.

Яке аз ҷузъҳои асосии ташаббус автоматиконии се пости гидрологӣ дар дарёҳои фаромарзӣ бо истифода аз сенсорҳои радарии сатҳи об мебошад. Технологияҳои нав ченкунии бетамоси суръати ҷараёни рӯизаминӣ, ҳисоб кардани хароҷоти об ва назорати доимии сатҳи обро таъмин менамоянд, ки дар давраҳои хавфи обхезӣ аҳамияти хос дорад.

Постҳои автоматиконидашуда дар ноҳияи Бобоҷон Ғафуров (пости «Қизил Қишлоқ»), ноҳияи Исфара (пости «Танги Ворух») ва ноҳияи Ашт (пости «Акҷар») ҷойгир буда, низоми мониторинги воқеии гидрологиро тақвият бахшида, самаранокии чораҳои пешгирӣ ва огоҳкунии барвақтро баланд мебардоранд.

Интизор меравад, ки татбиқи лоиҳа сатҳи ҳифз ва огоҳии тақрибан 552 700 нафар аҳолии минтақаро беҳтар намояд. Бо ин роҳ, ташаббус на танҳо як навсозии техникӣ, балки ҷузъи муҳими амнияти пешгирикунанда ва мутобиқшавӣ ба паёмадҳои тағйирёбии иқлим дар шароити низомҳои обии фаромарзӣ мегардад.

АКС: UNDP in Tajikistan