Душанбе, 16 январ, – АИ «Корвон Иттилоот». Рисолати дипломатии Сафири Фавқулода ва Мухтори Иёлоти Муттаҳидаи Амрико дар Ҷумҳурии Тоҷикистон Мануэл Микаллер ба анҷом мерасад. Ба ин муносибат вохӯрии ӯ бо вазири корҳои хориҷии Ҷумҳурии Тоҷикистон Сироҷиддин Муҳриддин баргузор гардид.

Зимни мулоқот ҷонибҳо вазъи кунунӣ ва дурнамои рушди муносибатҳои дуҷонибаи Тоҷикистону ИМА-ро баррасӣ намуда, ҳамчунин доираи васеи масъалаҳои мубрами рӯзномаи минтақавӣ ва байналмилалиро мавриди муҳокима қарор доданд.

Тибқи иттилои расмии Вазорати корҳои хориҷии Тоҷикистон, вохӯрӣ дар фазои созанда ва ҳусни тафоҳум сурат гирифтааст. Сироҷиддин Муҳриддин ба Мануэл Микаллер барои саҳми арзандааш дар таҳкими муносибатҳои дӯстона ва рушди ҳамкории байни Тоҷикистону ИМА изҳори сипос намуд.

Вазири корҳои хориҷӣ ҳамчунин ба дипломати амрикоӣ дар идомаи фаъолияти касбиаш барору комёбӣ орзу карда, нақши муколамаи сиёсӣ ва талошҳои дипломатиро дар густариши ҳамкорӣ муҳим арзёбӣ кард.

Анҷоми фаъолияти сафири ИМА марҳалаи муайянеро дар равобити дуҷониба ҷамъбаст намуда, заминаи идомаи ҳамкории созанда байни ду кишварро дар оянда фароҳам меорад.

АКС: Вазорати корҳои хориҷии Тоҷикистон