Душанбе, 25 сентябр, – АИ «Корвон Иттилоот». Аз 1 октябри соли 2025 расмикунонии молҳои воридотию содиротӣ ва воситаҳои нақлиёт дар Ҷумҳурии Тоҷикистон тавассути низоми иттилоотии «АСИКУДА» (ASYCUDA) амалӣ мегардад. Дар ин бора маркази матбуоти Хадамоти гумруки назди Ҳукумати Ҷумҳурии Тоҷикистон хабар медиҳад.
Мақсад аз ин навоварӣ иҷрои барномаҳо ва стратегияҳои давлатӣ дар самти рақамикунонии иқтисоди миллӣ ва мутобиқсозии расмикунонии гумрукӣ ба меъёрҳои байналмилалӣ арзёбӣ мешавад.
Тарзи фаъолият
Тибқи талаботи нав, воридкунандагон уҳдадоранд маълумоти пешакии молҳо ва воситаҳои нақлиётро на дертар аз ду соат то расидан ба марзи гумрукӣ дар шакли электронӣ пешниҳод кунанд.
Низоми иттилоотии «АСИКУДА» асосан дар реҷаи автоматикӣ бо истифода аз унсурҳои зеҳни сунъӣ фаъолият мекунад.
Низом тамоми тартибот ва реҷаҳои барасмиятдарории гумрукии молҳо ва воситаҳои нақлиётро фаро мегирад ва самаранокии кори хадамоти гумрукро баланд мебардорад.
Ба гуфтаи Хадамоти гумрук, ҷорӣ намудани ASYCUDA имконият медиҳад, ки:
- расмикунонии гумрукӣ содда ва суръат дода шавад;
- шаффофияти амалиётҳо таъмин гардад;
- сатҳи назорат ва ҷамъоварии боҷу андозҳо баланд гардад;
- воридоти маблағҳо ба буҷети давлатӣ афзоиш ёбад;
- амалиёти ғайринақдӣ бештар истифода шавад.
ASYCUDA (Automated System for Customs Data) аз ҷониби Конфронси СММ оид ба савдо ва рушд (ЮНКТАД) таҳия шудааст ва ҳоло дар беш аз 80 кишвар истифода мегардад. Ин низом мониторинги гумрукро автоматӣ намуда, ҳисобу китобҳои андозро иҷро мекунад ва омилҳои субъективии инсонро ҳангоми санҷиши эъломияҳо ба ҳадди ақал мерасонад.
Ба ин тартиб, ҷорӣ намудани ASYCUDA дар Тоҷикистон як қадами муҳими рақамикунонии расмикунонии гумрукӣ буда, кишвари моро ба стандартҳои байналмилалии маъмурияти фаъолияти иқтисодии хориҷӣ наздик месозад.
АКС: tamognia tj