Душанбе, 23 сентябр, – АИ «Корвон Иттилоот».  Дар шаҳри Душанбе ҷаласаи навбатии Коллегияи муштараки вазоратҳои корҳои дохилии Ҷумҳурии Тоҷикистон ва Федератсияи Русия баргузор гардид. Дар кори он Вазири корҳои дохилии Тоҷикистон Рамазон Раҳимзода ва Вазири корҳои дохилии Русия Владимир Колоколсев ширкат варзиданд.

Дар рӯзномаи ҷаласа масъалаҳои густариши ҳамкории шуъбаҳои тафтишотии ду кишвар, натиҷаҳои истифодаи пойгоҳи байнидавлатии иттилоотӣ ва инчунин тасдиқи Нақшаи кори муштараки ВКД Тоҷикистон ва Русия барои соли 2026 баррасӣ шуданд.

Зимни ифтитоҳи ҷаласа Рамазон Раҳимзода изҳор дошт, ки ҳамкориҳои миёни сохторҳои корҳои дохилии Тоҷикистон ва Русия рӯз ба рӯз таҳким меёбанд ва дар чорчӯбаи фаъолияти Коллегияи муштарак рушд хоҳанд кард.

Дар ҷараёни муҳокимаҳо тамоюли мусбати ҳамкории мақомоти тафтишоти ибтидоии ду кишвар таъкид гардид ва зарурати таҳкими ҳамкориҳои минбаъда бо мақсади таҳқиқи босифати ҷиноятҳо, аз ҷумла ҷиноятҳои фаромиллӣ, зикр шуд.

Таваҷҷуҳи ҷудогона ба иҷрои амалҳои мурофиавӣ дар доираи ёрии ҳуқуқӣ оид ба парвандаҳои ҷиноятӣ ва инчунин масъалаи мубориза бо ҷиноятҳои киберӣ равона гардид. Бо дарназардошти рушди босуръати технологияҳои рақамӣ, ҷонибҳо аҳамияти такмили заминаи ҳуқуқии байналмилалӣ барои мубодилаи иттилоот дар шакли электронӣ ва ҳамоҳангсозии амалҳо дар соҳаи амнияти иттилоотиро таъкид карданд.

Владимир Колоколсев, вазири корҳои дохилии Русия, дар ҷаласа таъкид намуд, ки ҳамкорӣ бо ҳамкасбони тоҷик дар самти мубориза бо ҷинояткорӣ хусусияти низомманд дошта, баргузории мунтазами чорабиниҳои муштаракро дар бар мегирад.

Натиҷаҳои ҷаласа исбот карданд, ки фаъолияти Коллегияи муштараки ВКД ду кишвар воситаи муҳими таҳкими ҳамкориҳои мутақобилан судманд, рушди муносибатҳои дуҷониба ва пешгирии ҷинояткорӣ мебошад.

АКС: Вазоратҳои корҳои дохилии Ҷумҳурии Тоҷикистон