Душанбе, 03 декабр, – АИ «Корвон Иттилоот». 1 декабр дар шаҳри Сеул (Ҷумҳурии Корея) ҷаласаи навбатии Гурӯҳи кории байниидоравӣ дар доираи лоиҳаи «Рушди соҳаҳои молиявӣ ва хусусӣ» байни Ҷумҳурии Тоҷикистон ва Гурӯҳи Бонки Ҷаҳонӣ баргузор гардид. Дар маркази муҳокимаҳо ҷараёни амалисозии Қисми 3-и лоиҳа – Барномаи рушди таъминкунандагон қарор дошт.

Роҳбарияти Агентии рушди савдо ва сармоягузории Ҷумҳурии Корея (KOTRA) ба ҷонибҳои Тоҷикистон маълумот дар бораи таърихи агентӣ, самтҳои фаъолият ва хизматрасониҳои он пешниҳод намуд. Ҳайати Тоҷикистон бошад, имкониятҳои сармоягузорӣ, имтиёзҳои ҷалби сармоя, вазъи содирот, иқтидори фаъолияти соҳибкорӣ ва бартариҳои минтақаҳои озоди иқтисодиро муаррифӣ кард.

Зимни мулоқот инчунин ба густариши ҳамкориҳои тиҷоративу иқтисодӣ таъкид шуд. Ҷониби Тоҷикистон намояндагони KOTRA-ро ба иштирок дар форумҳо ва намоишгоҳҳои байналмилалӣ, ки дар Тоҷикистон баргузор мегарданд, даъват намуд.

Муовини аввали раиси Палатаи савдо ва саноати Ҷумҳурии Тоҷикистон Насимҷон Анваров ба роҳбарияти агентӣ «Дастури тиҷоратии Тоҷикистон»-ро пешниҳод кард — маводи иттилоотӣ, ки аз ҷониби Палата ҳамкорӣ бо вазорату идораҳои дахлдор таҳия шудааст.

Ба гуфтаи коршиносон, ҳамкории мунтазам бо сохторҳои байналмилалӣ, аз ҷумла Бонки Ҷаҳонӣ ва KOTRA, имкони беҳтарсозии муҳити сармоягузорӣ, тавсеаи фаъолияти соҳибкорӣ ва баланд бурдани рақобатпазирии иқтисоди миллиро бештар мегардонад.

АКС: Палатаи савдо ва саноати Ҷумҳурии Тоҷикистон