Душанбе, 02 январ, 2026 – АИ «Корвон Иттилоот». Суҳбати телефонии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо Президенти Федератсияи Русия муҳтарам Владимир Путин, ки 31 декабр баргузор гардид, на танҳо як тамоси расмӣ дар остонаи Соли нав, балки нишонаи устувории муколамаи стратегии Тоҷикистону Русия дар шароити чолишҳои минтақавӣ ва ҷаҳонӣ арзёбӣ мешавад.
Зимни суҳбат Сарвари давлати Тоҷикистон ҳамлаи ахири бесарнишинҳоро ба қароргоҳи Президенти Федератсияи Русия дар вилояти Новгород қатъиян маҳкум намуд. Эмомалӣ Раҳмон таъкид кард, ки чунин амалҳо, ки ба объектҳои давлатӣ ва амнияти роҳбарияти олии кишвар нигаронида шудаанд, комилан ғайриқобили қабул мебошанд. Ба гуфтаи ӯ, ин гуна иқдомҳо на танҳо ба пояҳои амнияти байналмилалӣ латма мезананд, балки раванди музокиротро, ки ба таъмини сулҳ ва субот равона гардидааст, халалдор месозанд.
Ин мавқеъ бозгӯи сиёсати пайгиронаи Тоҷикистон аст, ки солҳои охир ҷонибдори ҳалли сиёсӣ-дипломатии низоъҳо ва пешгирии шиддатёбии хушунат дар шароити мураккаби вазъи байналмилалӣ мебошад. Дар ин замина Душанбе ҳамраъйии худро бо шарикон дар масъалаҳои ҳифзи соҳибихтиёрӣ, тамомияти арзӣ ва амнияти давлатҳо нишон медиҳад.
Ҷойгоҳи муҳим дар суҳбат ҷанбаи инсонӣ ва рамзӣ низ дошт. Президентҳои Тоҷикистон ва Русия якдигарро бо фарорасии Соли нави 2026 самимона табрик гуфта, барояшон сиҳатии комил ва муваффақият дар фаъолияти давлатӣ, инчунин ба халқҳои ҳар ду кишвар сулҳи пойдор, осоиштагӣ ва шукуфоии минбаъдаро орзу намуданд. Ин иқдом боз як бори дигар хусусияти дӯстона ва анъанавии муносибатҳои дуҷонибаро, ки бар пояи эҳтироми мутақобил ва робитаҳои таърихӣ устувор аст, таъкид кард.
Дар поёни суҳбат сарони давлатҳо рушди мусбати ҳамкориҳои Тоҷикистону Русияро баланд арзёбӣ намуда, омодагии худро ҷиҳати густариши шарикии стратегӣ дар соли 2026 тасдиқ карданд. Ин ҳамкорӣ соҳаҳои сиёсӣ, иқтисодӣ, гуманитарӣ ва амниятиро фаро гирифта, дар шароити тағйирёбии равандҳои минтақавию ҷаҳонӣ аҳамияти хос пайдо мекунад.
Ба ин тартиб, суҳбати телефонии баргузоршуда сатҳи баланди эътимоди сиёсӣ миёни Душанбе ва Маскав ва омодагии ҷонибҳоро ба ҳамкории ҳамоҳангшуда ба манфиати субот ва рушд бозгӯ намуд.
АКС: АМИТ «ХОВАР»