Душанбе, 04 декабр, – АИ «Корвон Иттилоот». 2 декабр Вазири корҳои хориҷии Ҷумҳурии Тоҷикистон Сироҷиддин Мӯҳриддин мулоқоти расмӣ бо Директори минтақавии таҳқиқотӣ дар Осиёи Институти байналмилалии идоракунии захираҳои об (IWMI) Йохан Ҷели баргузор намуд.

Дар ҷараёни музокирот ҷонибҳо имкониятҳои густариши ҳамкорӣ байни Тоҷикистон ва Институтро дар самтҳои асосии идоракунии захираҳои об, мутобиқшавӣ ба тағйирёбии иқлим ва амалӣ кардани лоиҳаҳои муштараки минтақавӣ баррасӣ карданд.

Вазир Мӯҳриддин аҳамияти тақвияти ҳамкории илмию таҳқиқотӣ ва амалӣ бо созмонҳои байналмилалиро барои идоракунии самараноки захираҳои оби кишвар таъкид намуда, ташаббусҳои ҷории Тоҷикистон дар ин соҳа ро низ муаррифӣ намуд.

Таваҷҷуҳи махсус ба омодагӣ ба Чоруми Конфронси байналмилалии сатҳи баланд оид ба Даҳсолаи байналмилалии амал «Об барои рушди устувор, 2018–2028», ки моҳи майи соли 2026 дар Душанбе баргузор мегардад, равона гардид. Вазир Институтро ба иштироки фаъол дар омодагӣ ва баргузории ин чорабинии сатҳи баланд даъват намуда, аҳамияти мубодилаи байналмилалии таҷриба ва донишҳои экспертиро таъкид кард.

Мулоқот қадами дигар дар роҳи тақвияти ҳамкории байналмилалии Тоҷикистон дар соҳаи захираҳои об ва рушди устувори минтақа гардид.

АКС: Вазорати корҳои хориҷии Тоҷикистон