Душанбе, 22 сентябр, – АИ «Корвон Иттилоот».  Дар ояндаи наздик сокинони Тоҷикистон ва Арабистони Саудӣ метавонанд байни пойтахтҳои ду кишвар бе гузаргоҳ сафар кунанд. Парвозҳои мустақими ширкати «Flynas» қадами муҳими тақвияти ҳамкории иқтисодӣ, сайёҳӣ ва фарҳангӣ хоҳанд буд.

Дар доираи васеъ кардани ҳамкории авиатсионӣ байни Тоҷикистон ва Шоҳигарии Арабистони Саудӣ, дар ояндаи наздик парвозҳои мустақим ба самти Душанбе – Ҷидда оғоз меёбанд.

Вазири фавқулода ва мухтори Саудӣ дар Тоҷикистон Вали ибн Абдурраҳмон ар-Решаидон гуфт, ки парвозҳо аз ҷониби ширкати ҳавопаймоии «Flynas», ки тақрибан 20 соли таҷрибаи кор дорад, анҷом дода мешаванд.

Ифтитоҳи парвозҳои мустақим имкониятҳои нав барои тақвияти робитаҳои тиҷоратӣ ва иқтисодии кишварҳоро фароҳам меорад ва ҳамзамон барои рушди сайёҳӣ ва мубодилаи фарҳангӣ замина мегузорад.

Дар соли 2024 Раиси Кумитаи генералии авиатсияи граждании Саудӣ Абдулазиз ибн Абдулло ал-Дуайлиҷ ба Тоҷикистон ташриф оварда, бо Директори Агентии авиатсияи гражданӣ назди Ҳукумати Тоҷикистон Хабибулло Назарзода мулоқот намуд. Дар ин сафар созишномаи иловагӣ имзо шуд, ки афзоиши шумораи парвозҳои мустақим, аз ҷумла се парвоз дар як ҳафта байни Душанбе ва Ҷиддаро пешбинӣ мекунад.

Вазири фавқулода ва мухтори Саудӣ таъкид кард, ки ҳамкории ду кишвар дар соҳаи авиатсияи гражданӣ дар оянда фаъолона рушд хоҳад ёфт ва робитаҳои иқтисодӣ ва сайёҳиро боз ҳам қавӣ мекунад.

АКС: НИАТ «Ховар»