Душанбе, 04 октябр, – АИ «Корвон Иттилоот». 2 октябр дар пойтахти Тоҷикистон бо ибтикори Маркази зиддитеррористии кишварҳои узви ИДМ машқи амалӣ доир гардид, ки бахши омодагӣ ба марҳалаи аввали тамрини муштараки зиддитеррористии «Ҳамдӯстӣ-Антитеррор — 2025» маҳсуб меёбад.

Чорабинӣ ба такмил бахшидани малакаҳои ҳамоҳангии роҳбарон ва кормандони мақомоти салоҳиятдори кишварҳои ИДМ ҳангоми иҷрои чорабиниҳои фаврӣ-ҷустуҷӯии мувофиқ равона шуда, таваҷҷуҳи махсус ба масъалаи ошкор ва пешгирии эҳтимолии амалҳои террористӣ бо истифода аз низомҳои иттилоотии дастаҷамъӣ зоҳир гардид.

Дар ҷараёни машқ сардори шуъбаи Идораи таъминоти ташкилӣ-ҳуқуқӣ ва иттилоотию таҳлилии Бюрои ҳамоҳангсозии мубориза бо ҷинояткории муташаккил ва дигар ҷиноятҳои хавфнок дар ҳудуди ИДМ, полковники милитсия Юрий Вячеславович Кузнецов, доир ба таркиб ва имкониятҳои Бонки махсуси иттилоотии БКБОП ба иштирокчиён маълумот пешниҳод намуд. Ин бонк воситаи муҳими мубодилаи иттилооти фаврӣ миёни кишварҳои ИДМ ба ҳисоб меравад.

Машқи мазкур минбаре барои мубодилаи таҷриба, баррасии усулҳои навини муқовимат ба таҳдидҳои муосир ва боло бурдани сатҳи маҳорати касбии мутахассисон гардид. Он нишон дод, ки муқовимати самаранок ба хатарҳои замонавӣ танҳо дар ҳолати ҳамкории зич ва эътимод миёни давлатҳои минтақа имконпазир аст.

Гузаронидани омодагии тамрини бузурги зиддитеррористӣ маҳз дар шаҳри Душанбе нақши рӯзафзуни Тоҷикистонро ҳамчун яке аз иштирокчиёни калидии низоми амнияти дастаҷамъӣ таъкид мекунад. Ҷумҳурии Тоҷикистон, ки дар марзи муҳими стратегӣ қарор дорад ва бо як қатор таҳдидҳои беруна рӯ ба рӯ мешавад, на танҳо қабулкунанда, балки ташаббускори ҳифзи дастаҷамъии минтақа низ мебошад.

Чунин чорабиниҳо нуфузи байналмилалии кишварро тақвият бахшида, заминаи устувор барои ҳамкории дарозмуддат дар мубориза бо терроризм ва ҷинояткории муташаккил дар фазои ИДМ фароҳам меоранд.

ФОТО: Хадамоти матбуоти Кумитаи иҷроияи ИДМ