Душанбе, 20 декабр, 2025 – АИ «Корвон Иттилоот».  Дар пойтахти Тоҷикистон қадами навбатии муҳими стратегӣ дар роҳи дигаргунсозии технологии иқтисод гузошта шуд. 18 декабр дар шаҳри Душанбе бо иштироки Сарвазири Ҷумҳурии Тоҷикистон Коҳир Расулзода Корхонаи воҳиди давлатии «Маркази рақамигардонӣ, инноватсия ва такмили ихтисоси кадрҳо дар соҳаи кишоварзӣ» ифтитоҳ гардид. Маркази нав ба платформаи калидӣ барои ҷорӣ намудани технологияҳои пешрафта, омода намудани мутахассисони насли нав ва баланд бардоштани устувории бахши аграрии кишвар табдил меёбад.

Дар ҷараёни маросими ифтитоҳ намоишгоҳи дастовардҳои илмӣ ва инноватсионии соҳаи кишоварзӣ баргузор гардида, имкониятҳои илмии ватанӣ ва самаранокии қарорҳои рақамӣ дар амал муаррифӣ шуданд.

Сарвазири кишвар Коҳир Расулзода зимни суханронӣ таъкид намуд, ки ифтитоҳи марказ оғози марҳилаи сифатан нави технологӣ дар рушди соҳаи кишоварзӣ мебошад. Ба гуфтаи ӯ, бо сиёсати дурандешонаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон солҳои 2025–2030 дар кишвар «Солҳои рушди иқтисоди рақамӣ ва инноватсия» эълон шудаанд.

Ҳадафи асосии ин сиёсати стратегӣ — навсозии ҳамаҷонибаи иқтисод ва таъмин намудани сатҳи шоистаи зиндагии аҳолӣ тавассути ҷорӣ намудани технологияҳои муосир, аз ҷумла платформаҳои рақамӣ ва зеҳни сунъӣ мебошад.

«Ҳукумати Ҷумҳурии Тоҷикистон дар доираи Стратегияи миллии рушд то соли 2040 рушди иқтисоди рақамиро фаъолона пеш мебарад ва ба рақамигардонии хизматрасониҳои давлатӣ, рушди инфрасохтор, татбиқи зеҳни сунъӣ ва таъмини амнияти миллӣ афзалияти аввалиндараҷа медиҳад. 

Ин раванд заминаи ҳуқуқиро барои гузариш ба ҳукумати электронӣ ва рушди тиҷорати электронӣ бо истифода аз зеҳни сунъӣ фароҳам меорад. Бе рушди технологияҳои агросаноатӣ таъмин намудани амнияти озуқаворӣ ва боло бурдани сатҳи некӯаҳволии аҳолӣ ғайриимкон аст», — таъкид намуд Сарвазир.

Тибқи иттилоъ, марказ дар доираи Лоиҳаи баланд бардоштани устувории соҳаи кишоварзӣ бо дастгирии Бонки ҷаҳонӣ пурра таъмир ва бо таҷҳизоти муосир таъмин гардидааст. Дар заминаи он омӯзиши мутахассисони соҳаи кишоварзӣ оид ба истифодаи технологияҳои муосир ба роҳ монда мешавад.

Ташаккули кадрҳои баландихтисос ҳамчун шарти асосии рушди устувори соҳаи кишоварзӣ дар шароити тағйироти босуръати технологӣ арзёбӣ мегардад.

Президенти Ҷумҳурии Тоҷикистон муҳтарам Эмомалӣ Раҳмон борҳо таъкид намудаанд, ки фаъолгардонии равандҳои инноватсионӣ ва истифодаи ҳамаҷонибаи имкониятҳои технологияҳои рақамӣ яке аз самтҳои афзалиятноки сиёсати иқтисодии кишвар мебошад. Дар ҳамин замина солҳои 2025–2030 «Солҳои рушди иқтисоди рақамӣ ва инноватсия» эълон гардиданд.

Дар Паёми худ ба Маҷлиси Олӣ 16 декабри соли 2025 Сарвари давлат ба масъалаҳои густариши рақамигардонӣ, рушди иқтисоди рақамӣ ва татбиқи зеҳни сунъӣ таваҷҷуҳи махсус зоҳир намуданд. Таъкид гардид, ки бо ташаббуси Тоҷикистон Ассамблеяи генералии Созмони Милали Муттаҳид қатъномаи махсуси «Нақши зеҳни сунъӣ дар фароҳам овардани имкониятҳои нав барои рушди устувор дар Осиёи Марказӣ»-ро қабул намудааст.

Ба гуфтаи коршиносон, кишоварзии рақамӣ имрӯз на танҳо воситаи навсозии равандҳои истеҳсолӣ, балки яке аз роҳҳои муассири афзоиши ҳаҷми истеҳсол, беҳтар намудани дастрасии аҳолӣ ба захираҳои озуқаворӣ ва таъмини амнияти ғизоӣ мебошад.

Барои Тоҷикистон, ки соҳаи кишоварзӣ яке аз бахшҳои калидии иқтисод ба шумор меравад, рақамигардонӣ на танҳо зарурат, балки имконияти воқеии расидан ба рушди устувор аст. Татбиқи технологияҳои рақамӣ имкон медиҳад назорати дақиқи аграрӣ ҷорӣ гардад, идоракунии самаранок таъмин шавад, талафот коҳиш ёбад ва занҷираи пайвастаи истеҳсоли маҳсулоти аз ҷиҳати экологӣ тоза, мутобиқ ба меъёрҳои байналмилалӣ ташаккул ёбад.

Дар шароите ки ҷаҳон бо суръати бесобиқа тағйир меёбад, маҳз чунин марказҳо пояи кишоварзии рақобатпазир, устувор ва ба оянда нигаронидашударо мегузоранд.

АКС: АМИТ “ХОВАР”