Душанбе, 23 декабр, 2025 – АИ «Корвон Иттилоот». Дар ноҳияи Синои шаҳри Душанбе озмуни зеҳнии «Ҷилои дониш» баргузор гардид, ки беш аз 8 ҳазор хонандаи синфҳои ибтидоиро фаро гирифт. Озмун дар 28 муассисаи таҳсилоти миёнаи умумии ноҳия доир шуда, хонандагони синфҳои 3–4-умро муттаҳид намуд.

Тавре Хадамоти матбуоти Вазорати маориф ва илми Ҷумҳурии Тоҷикистон хабар медиҳад, ҳадафи асосии баргузории озмун дарёфти хонандагони лаёқатманд, баланд бардоштани сатҳи дониш, рушди тафаккури зеҳнӣ ва таҳкими шавқу ҳаваси кӯдакон ба раванди таълим мебошад.

Ба гуфтаи ташкилкунандагон, озмуни «Ҷилои дониш» на танҳо дониши хонандагонро месанҷад, балки ба рушди тафаккури мантиқӣ, қобилияти таҳлил ва ангезаи омӯзишии онҳо мусоидат мекунад. Дар ҷараёни озмун фазои рақобати солим, ҳамдигарфаҳмӣ ва дӯстӣ миёни иштирокчиён фароҳам оварда шуд.

Ин гуна чорабиниҳо барои зинаи таҳсилоти ибтидоӣ аҳамияти махсус доранд, зеро маҳз дар ҳамин давра заминаи шавқу завқ ба омӯзиш ва тафаккури мустақил ташаккул меёбад.

Дар натиҷаи баргузории муваффақонаи озмун қарор қабул гардид, ки дар оянда шумораи иштирокчиёни «Ҷилои дониш» то беш аз 50 ҳазор хонанда зиёд карда шавад.

Ин тасмим нишон медиҳад, ки низоми маориф ба ташкили механизмҳои устувор ва фарогири дарёфт ва дастгирии истеъдодҳо аз зинаҳои ибтидоии таҳсил таваҷҷуҳи ҷиддӣ зоҳир мекунад.

Густариши озмун метавонад ба таҳкими неруи зеҳнии кишвар ва тарбияи насли оянда, ки ба дониш, ташаббускорӣ ва рушд нигаронда шудааст, мусоидат намояд.

АКС: аз сомонаи  avesta.tj