Душанбе, 30 декабр, 2025 – АИ «Корвон Иттилоот». Аз 1 феврали соли 2026 дар Ҷумҳурии Тоҷикистон тарифҳои нав ба неруи барқ ва гармӣ ҷорӣ карда мешаванд. Қарори Ҳукумат «Дар бораи тарифҳо ба энергияи барқ ва гармӣ» имрӯз дар ҷаласаи навбатии Ҳукумати кишвар таҳти роҳбарии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон баррасӣ ва қабул гардид.

Тибқи иттилои хадамоти матбуоти Сарвари давлат, лоиҳаи қарор бо мақсади рушди соҳаи энергетика ва расидан ба сатҳи худтаъминкунии молиявию иқтисодии ҷамъиятҳои саҳҳомии кушодаи «Барқи Тоҷик», «Шабакаҳои интиқоли барқ» ва «Шабакаҳои тақсимоти барқ» таҳия ва пешниҳод шудааст. Ҳамзамон, дар хабар параметрҳои мушаххаси тарифҳои нав зикр нагардидаанд.

Дар маҷмӯъ, ҷаласаи Ҳукумат ба баррасии масъалаҳои муҳими стратегии рушди иқтисодию молиявии кишвар бахшида шуд. Мавзӯи калидӣ иҷрои Буҷети давлатии Ҷумҳурии Тоҷикистон барои соли 2026 буд. Президенти кишвар ба сохторҳои масъул супориш дод, ки ҷиҳати таъмини босифати қисми даромадии буҷет, аз ҷумла тавассути дарёфти манбаъҳои нави воридоти маблағҳо, тадбирҳои зарурӣ андешанд.

Ҳамзамон, Барномаи давлатии сармоягузорӣ барои солҳои 2026–2030 муаррифӣ гардид. Ҳадафи асосии он ҷалби сармоягузориҳои дохиливу хориҷӣ, аз ҷумла маблағгузории қарзӣ ва грантӣ, инчунин кӯмаки техникӣ, барои татбиқи лоиҳаҳои афзалиятнок дар соҳаҳои гуногуни иқтисод мебошад.

Мувофиқи маълумоти пешниҳодшуда, ба Барнома 864 лоиҳа ба маблағи умумии 15,7 миллиард доллари ИМА ворид гардидааст. Амалисозии ин ташаббусҳо аз ҷониби Ҳукумат ҳамчун яке аз омилҳои асосии таъмини рушди устувори иқтисодӣ, навсозии инфрасохтор ва баланд бардоштани рақобатпазирии иқтисоди миллӣ арзёбӣ мешавад.

Қабули қарорҳо оид ба сиёсати тарифӣ дар соҳаи энергетика дар баробари вазифаҳои васеи буҷетӣ ва сармоягузорӣ талоши давлатро барои мувозинати устувории молиявии соҳа бо ҳадафҳои дарозмуддати рушди иҷтимоию иқтисодӣ нишон медиҳад.

АКС: Хадамоти матбуоти Президенти Ҷумҳурии Тоҷикистон