Душанбе, 02 октябр, – АИ «Корвон Иттилоот». 30 сентябр дар шаҳри Душанбе маросими расмии супоридани кумаки башардӯстонаи Ҷумҳурии Қазоқистон ба Ҷумҳурии Тоҷикистон баргузор гардид. Тибқи ин иқдом, ҷониби қазоқ ба Тоҷикистон 5 ҳазор тонна мазут ба маблағи тақрибан 1,65 миллион доллари ИМА интиқол дод.

Шаҳодатномаи расмии қабул ва супоридани маводи сӯзишворӣ ба роҳбарияти Агентии захираҳои давлатии моддӣ дар назди Ҳукумати Ҷумҳурии Тоҷикистон аз ҷониби Сафири Фавқулода ва Мухтори Қазоқистон дар Тоҷикистон Валихан Турехан овруқ карда шуд.

Дар суханронии худ сафир таъкид намуд, ки ин кумак бахше аз ҳамкории дарозмуддати миёни ду кишвар мебошад. Қазоқистон бо дастгирии Агентии рушди байналмилалии KazAID қарори ихтисоси кумаки башардӯстона ба маблағи 893,7 миллион тенге-ро қабул намуд. Ба гуфтаи Турехан, ин иқдом барои таъмини амнияти энергетикии Тоҷикистон мусоидат намуда, рамзи ҳамсоягии нек ва пуштибонии мутақобила аст, ки асоси равобити Тоҷикистону Қазоқистонро ташкил медиҳад.

Тибқи иттилои Вазорати корҳои хориҷии Қазоқистон, қарор дар бораи додани кумаки мазкур бо супориши Президенти Қазоқистон Қосим-Ҷомарт Тоқаев қабул шудааст ва ҳадафи он дастгирии фаъолияти устувори иншооти энергетикии Тоҷикистон мебошад.

Дар панҷ соли охир ҳаҷми кумакҳои башардӯстонаи Қазоқистон ба Тоҷикистон беш аз 21 миллион доллари ИМА-ро ташкил дода, аз оғози ҳамкории дуҷониба ин рақам ба зиёда аз 44 миллион доллар расидааст.

Ғайр аз ин, ду кишвар ҳамкориро дар соҳаҳои энергетика ва дигар бахшҳои муҳим низ фаъолона тавсеа медиҳанд, ки инро як қатор лоиҳаҳои муштарак ва созишномаҳои баимзорасида тасдиқ мекунанд.

АКС: Агентии захираҳои давлатии моддӣ дар назди Ҳукумати Ҷумҳурии Тоҷикистон