Душанбе, 12 январ, – АИ «Корвон Иттилоот». Дар ноҳияи Исмоили Сомонии пойтахт 10 январ  машқи пагоҳирӯзӣ баргузор гардид, ки бо дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон амалӣ карда шуд. Ин чорабинӣ бо мақсади таҳкими саломатии аҳолӣ ва таблиғи варзиши оммавӣ доир гашт.

Аксия тибқи дастуру супоришҳое, ки зимни мулоқот бо намояндагони ҷавонон 23 майи соли 2013 ва дар Маҷлиси васеи Ҳизби Халқии Демократии Тоҷикистон 17 июли соли 2025 иброз гардида буданд, баргузор шуд. Ҳадаф аз чорабинӣ иштироки фаъолонаи роҳбарон ва кормандони тамоми соҳаҳо ва ташаккули одати мунтазам ба машқҳои ҷисмонӣ мебошад.

Машқи пагоҳирӯзӣ таҳти унвони «Зебоӣ, тавоноӣ ва доноӣ аз варзиш аст» дар боғи Аҳмади Дониш доир шуд. Дар он роҳбарият ва кормандони шуъбаю бахшҳои мақомоти иҷроияи ҳокимияти давлатии ноҳия, намояндагони Суди Олии Ҷумҳурии Тоҷикистон ва Суди Конститутсионӣ, кормандони Бонки миллии Ҷумҳурии Тоҷикистон, Кумитаи рушди маҳал, «Амонатбонк» ва муассисаҳои таҳсилоти олии касбӣ фаъолона ширкат варзиданд.

Иштирокчиён бо рӯҳияи баланди ҳамбастагӣ ва масъулияти шаҳрвандӣ машқи ҷисмонӣ анҷом дода, намунаи равшани оммавияти варзишро нишон доданд. Таҷриба нишон дод, ки чунин машқҳои мунтазам на танҳо ба таҳкими саломатӣ, балки ба густариши ҳисси ҳамбастагӣ ва масъулияти шаҳрвандӣ низ мусоидат менамоянд.

Ҳамчунин таъкид гардид, ки ҳар шанбе дар қаламрави ҷумҳурӣ ҳамчун «Рӯзи варзиш» таҷлил шуда, иштироки роҳбарон ва масъулини тамоми соҳаҳо дар машқҳои пагоҳирӯзӣ ҳатмӣ мебошад. Ин амал тадриҷан ба анъанаи миллӣ табдил ёфта, ба рушду густариши фарҳанги солимии ҷисмонӣ ва тарбияи шаҳрвандии ҷавонон дар тамоми кишвар мусоидат мекунад.

АКС: Мақомоти иҷроияи ҳокимияти давлатии ноҳия И. Сомони