Душанбе, 30 январ, – АИ «Корвон Иттилоот». 28 январ дар шаҳри Душанбе мулоқоти муовини Вазири корҳои хориҷии Ҷумҳурии Тоҷикистон Нигина Ализода бо Сафири Фавқулода ва Мухтори Ҷумҳурии Қирғизистон дар Ҷумҳурии Тоҷикистон Эрлан Абдылдаев баргузор гардид.

Тавре аз Вазорати корҳои хориҷии Тоҷикистон иттилоъ доданд, зимни вохӯрӣ ҷонибҳо вазъи кунунӣ ва дурнамои рушди муносибатҳои дуҷонибаро дар соҳаҳои иқтисодӣ, фарҳангӣ ва гуманитарӣ мавриди баррасӣ қарор доданд. Ҳамчунин, ҷараёни татбиқи санадҳои баимзорасида ва барномаҳои ҳамкории миёни Тоҷикистон ва Қирғизистон мавриди таҳлил қарор гирифт.

Ҷонибҳо аҳамияти иҷрои пайдарпай ва самараноки тавофуқоти ҳосилшударо таъкид намуда, онҳоро омили муҳими таҳкими эътимод ва густариши ҳамкории амалӣ арзёбӣ карданд. Дар ин замина, омодагии тарафҳо ҷиҳати идомаи таҳкими шарикии дуҷониба, ки ба натиҷаҳои дарозмуддат ва мутақобилан судманд равона гардидааст, тасдиқ шуд.

Баррасии мунтазами раванди татбиқи барномаҳои муштарак ҳамчун ҷузъи муҳими ташаккули рӯзномаи устувори муносибатҳои Тоҷикистону Қирғизистон арзёбӣ мегардад, ки ба тақвияти ҳамкории байнидавлатӣ ва суботи минтақавӣ мусоидат мекунад.

АКС: Вазорати корҳои хориҷии Тоҷикистон